Foto: Toshkentdagi Milliy bog‘ o‘rnida qurilgan attraksionlar parkidagi mushakbozlik

2021-yilning fevralida Toshkentdagi Alisher Navoiy nomidagi O‘zbekiston Milliy bog‘i hududida Magic City zamonaviy madaniyat va istirohat bog‘i qurilayotgani to‘g‘risida xabar berilgandi. 31-may kuni ushbu yangi ko‘ngilochar bog‘ning ochilishi munosabati bilan mushakbozlik uyushtirildi.

Ta’kidlanishicha, Toshkentdagi Mehribonlik uylarining tarbiyalanuvchilari Magic City ko‘ngilochar bog‘ining ilk mehmonlariga aylangan. Poytaxt hokimligi tantanali marosimda Yuriy Korsunsev tomonidan olingan suratlar bilan bo‘lishdi.

Bog‘ hududidagi 9 gektar maydonda okeanarium, bir vaqtning o‘zida 450 nafar tomoshabin sig‘adigan Rimdagi Kolizey kabi amfiteatr, 6 ta zaldan iborat kinoteatr, 19 ta attraksiondan iborat ko‘ngilochar o‘yingoh, ertaknamo qasr, maydoni 8 500 kvadrat metr bo‘lgan musiqali favvora, avtomobillar turargohi qurilgan.

Toshkent shahar hokimi Jahongir Ortiqxo‘jayev tantanali marosimda ishtirok etib, barchani poytaxtdagi yangi madaniyat maskani bilan tabriklagan va bog‘ni tashrifchilar uchun ochiq deb e’lon qilgan.