Shahrisabz hokimi qabuliga borgan ayol jamoatchilik tartibini saqlash bahonasida bir kun “jinnixona”ga tiqib qo‘yildi

Qashqadaryo viloyatining Shahrisabz shahrida hokim qabuliga shikoyat qilib borgan ayol jamoatchilik tartibini saqlash bahonasida bir kun majburiy tartibda asab-ruhiy kasalliklar shifoxonasiga joylashtirildi. Bu haqda “Daryo”ga murojaat qilgan shahrisabzlik ayol Nodira O‘rinova ma’lum qildi.

Ma’lum bo‘lishicha, 1964-yilda tug‘ilgan va ikkinchi guruh nogironligi bo‘lgan Nodira O‘rinovaning takroriy murojaatlari inobatga olinib, 2018-yil unga Shahrisabz shahar hokimligi tomonidan bepul uy-joy berilgan.

“Muhtaram Prezidentimiz Shavkat Mirziyoyevga, rahmat. Mendek nogironligi bor ayollarga bepul uy-joy berish tartibini joriy qildi. Shu sabab menga ham uch xonali uy berildi. Buning uchun alohida, rahmat, hammaga. Biroq menga berilmagan uy-jihozlarini — gilam, televizor, xontaxtalarni ‘berildi’ deya respublika Kasaba uyushmasiga ma’lumot berilgan. Demak, menga berilgan uy-jihozlarini kimdir o‘zi olgan va uy-jihozlari mening nomimda qolgan. Men shu adolatsizlikni fosh qilish maqsadida MFY raisi, mahalla va oilani qo‘llab-quvvatlash bo‘limining (o‘sha paytdagi — tah.) rahbari Shahlo Rahmonovaga ko‘plab murojaatlar qildim, ammo natijasi bo‘lmadi”, — deydi murojaatchi Nodira O‘rinova.

Qashqadaryo viloyat Mahalla va oilani qo‘llab-quvvatlash boshqarmasi boshlig‘i Dolli Allayevning 2021-yil 30-yanvar kuni fuqaro Nodira O‘rinovaga yo‘llagan javob xatida unga yangi uy bilan birga xontaxta, televizor va gilam berilgani haqida noto‘g‘ri axborot bergan “Do‘stlik” MFY raisi Rustam Bozorov hamda uning o‘rinbosari Mohira Karimovalar shu qilmishi uchun lavozimidan olingani ma’lum qilingan.

“Shahrisabz shahriga yangi hokim Akrom Sulaymonov kelgach, yangi hokimga ham bu haqda shikoyat qildim va ko‘zbo‘yamachilikning boshida turgan Shahlo Rahmonovaning qilmishlarini ochib tashladim. Biroq murojaatlarimga o‘z vaqtida javob berilmagani uchun 2021-yilning 5-aprel kuni hokim qabuliga qayta bordim va xatimga javob talab qildim. Shunda hokim jahl ustida ‘chaqir uchastkavoyni’, dedi. Vaziyatdan foydalangan Shahlo Rahmonova esa, xatingizga men javob beraman deya, meni hokimlikning pastki qavatiga olib tushib, MFY raisi va ‘uchastkavoy’ga berib yubordi”, — deydi murojaatchi ayol.

Shahrisabz shahri hokimi Akrom Sulaymonov “Daryo” muxbiri bilan muloqotda Nodira O‘rinova bilan bog‘liq voqeani tasdiqladi.

“Haqiqatan ham Nodira opa ko‘p marotaba qabulimda bo‘lgan. Har safar u kishining murojaatini diqqat bilan tinglab, imkon qadar ijobiy yechim bilan qaytarishga harakat qilganman. Opa har safar qabulimga har xil muammolar bilan kelgan bo‘lishiga qaramay, deyarli muammolarining ijobiy yechimi bilan ortga qaytgan. O‘sha kuni (2021-yil 5-aprel — tah.) Nodira opa yana murojaat qilib keldi. Va hokimlik binosida baqir-chaqir, shovqin ko‘tarildi. Shunda Milliy gvardiya xodimlariga jamoatchilik tartibini saqlash haqida topshiriq berdim. Ammo voqea yakuni qanday tugagan, bundan xabarim yo‘q”, — deydi Shahrisabz shahri hokimi Akrom Sulaymonov.

Murojaatchi Nodira O‘rinovaning aniqlik kiritishicha, 2021-yil 5-aprel kunidagi voqea, uning Kitob tumanidagi viloyat 2-sonli asab-ruhiy kasalliklar shifoxonasiga qamalishi bilan yakunlangan.

“Shahlo Rahmonova meni hokimlik binosining pastki qavatiga olib tushib, ‘Do‘stlik’ mahallasining yangi raisi Farruh Iskanov hamda ‘uchastkavoy’ Zohid Amirqulovga ro‘para qildi. Mahalla raisi va ‘uchastkavoy’ mening qo‘limni orqaga qayirib, qo‘llarimni ko‘kartirib, ‘uchastkavoy’ning Matiz mashinasida “jinnixona”ga olib borib tashladi. Ularning adolatsizligi sabab men bir kun “jinnixona”da majburiy qamab qo‘yildim”, — deydi Nodira O‘rinova.

“Daryo” muxbiri so‘roviga javob bergan “Do‘stlik” MFY raisi Farruh Iskanov hamda hudud profilaktika inspektori Zohid Amirqulov murojaatchi Nodira O‘rinovaning Kitob tumanidagi viloyat 2-sonli asab-ruhiy kasalliklar shifoxonasiga olib borilganini tasdiqladi. Biroq bunga hokim topshiriq bermaganini aytib, Nodira O‘rinovaning shifoxonada ro‘yxatda turishini vaj qilib ko‘rsatdi.

“Haqiqatan ham opani asab-ruhiy kasalliklar shifoxonasiga olib borganmiz. Bunga hokim topshiriq bermagan. Opaning o‘zi shifoxona ro‘yxatida turgani va oldin ham Chuqursoyda davolanib kelgani uchun o‘sha kuni yo‘llanma bilan opani shifoxonaga olib borib joylashtirdik. Ammo kuch ishlatmadik. Balki mashinaga chiqarish uchun qo‘lidan tutgan bo‘lsak, qo‘li ko‘kargandir”, — deydi mahalla profilaktika inspektori Zohid Amirqulov.

“Do‘stlik” MFY raisi Farruh Iskanov murojaatchi Nodira O‘rinovaga 2018-yil yangi uy, shuningdek, o‘tgan yillar davomida ko‘p marotaba yordam berilishiga qaramasdan u shukur qilmayotganini aytmoqda.

“Nodira opaga yangi uy berilgan. Bundan tashqari ko‘plab moddiy yordam ko‘rsatilgan. Unga uy jihozlari berilgani haqida noto‘g‘ri ma’lumot bergan mahalla raisi va uning o‘rinbosari ham ishdan olingan. Shuncha chora ko‘rilsa-da, opa yana qayta-qayta hokim qabuliga borib, shikoyat qilgan. Nodira opa nega, umuman, rozi bo‘lmaydi, o‘zimiz ham tushunmaymiz”, — deydi MFY raisi.

Nodira O‘rinovaning qo‘shimcha qilishicha, u viloyat 2-sonli asab-ruhiy kasalliklar shifoxonasiga majburiy tartibda olib borilganida qabul bo‘limidagi shifokor uni qabul qilmasligini aytgan.

“Shunda MFY raisi shifokorni shahar hokimi o‘rinbosari Shahlo Rahmonova bilan telefonda gaplashtirdi. Telefonda nimalar gaplashildi bilmayman, lekin o‘sha kuni meni shifoxonada olib qolishdi. Menga shifoxonada yaxshi qarashdi. Biroq meni majburlab, menga kuch ishlatib qo‘llarimni qayirib, shifoxonaga olib borgan rais va ‘uchastkavoy’ga, shahar hokimi o‘rinbosari Shahlo Rahmonovaga chora ko‘rilishini va adolat yuzaga chiqishini so‘rayman”, — deydi murojaatchi Nodira O‘rinova.

Shahrisabz shahar hokimligi axborot xizmatining “Daryo”ga ma’lum qilishicha, shahar hokimi o‘rinbosari Shahlo Rahmonova bugungi kunda boshqa joyda faoliyat olib bormoqda. Shu bois, Shahlo Rahmonova bilan bu haqda suhbatlashish imkoni bo‘lmadi.

Nodira O‘rinova 2021-yilning 6-aprel kuni shifoxonadan qaytar chog‘i unga endi hokimlikka murojaat qilmaslik, adolatning ketini quvmasligi lozimligi haqida tushuntirish xati yozdirib olingan.