Prezident matbuot kotibi Sherzod Asadov 17-may, dushanba kuni Milliy matbuot markazida o‘tkazilgan brifingdan so‘ng jurnalistlarning savollariga javob qaytardi, deya xabar qilmoqda “Daryo” muxbiri.
Asadov davlat rahbarining joriy yilda qaysi xalqaro tadbirlarda ishtirok etishi rejalashtirilayotgani haqidagi savolga javob berarkan shunday dedi:
“Ko‘p tomonlama diplomatiya tashqi siyosatimizning asosiy yo‘nalishlaridan biri hisoblanadi. Umuman olganda, biz so‘nggi yillarda ko‘p tomonlama diplomatiyada jahon arenasida kuzatuvchidan faol ishtirokchiga aylandik. Shundan kelib chiqqan holda va epidemiologik vaziyatni inobatga olib, shu yil prezidentimizning bir qator anjumanlarda ishtirok etishi rejalashtirilgan.
Birinchisi, davlat rahbari Shavkat Mirziyoyev shu hafta Oliy Yevrosiyo iqtisodiy kengashining navbatdagi yig‘ilishida qatnashishi ko‘zda tutilgan.
Shuningdek, prezidentimiz iyul oyi o‘rtalarida Toshkent shahrida o‘tkazilishi rejalashtirilayotgan Markaziy va Janubiy Osiyo hududlarining o‘zaro bog‘liqligiga bag‘ishlangan xalqaro anjumanda ham ishtirok etadi.
Bundan tashqari, sentabr—oktabr oylariga rejalashtirilgan Shanhay hamkorlik tashkiloti va Mustaqil Davlatlar Hamdo‘stligi davlatlari yetakchilarining sammitida ham qatnashishi rejalashtirilgan.
Bu joriy yilning oktabrigacha bo‘lgan tadbirlar. Mazkur tadbirlarning qanday formatda o‘tishi: onlaynmi yoki oflaynmi, epidemiologik vaziyatdan kelib chiqib diplomatik kanallar orqali aniqlashtiriladi”, — dedi Sherzod Asadov.
Izoh (0)