Namanganda viloyatning sobiq hokimi Ikromxon Najmiddinov 70 yoshga to‘lishi munosabati bilan tantanali tadbir bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Ikromxon Najmiddinov Prezident farmoniga asosan “Mehnat shuhrati” ordeni bilan taqdirlandi. Tadbirda ishtirok etgan Oliy Majlis Qonunchilik palatasi spikeri Nurdinjon Ismoilov ushbu farmonni o‘qib eshittirdi va mukofotni egasiga topshirdi.
Shundan so‘ng Namangan viloyati hokimi Shavkat Abdurazzoqov, Farg‘ona viloyati hokimi Xayrullo Bozorov, Oliy Majlis Senati qo‘mita raisi Bahodir Tojiyev, mehnat faxriysi Botirali Hakimov va boshqalar so‘zga chiqib, Ikromxon Najmiddinovning viloyat va mamlakat rivoji uchun qo‘shgan hissasini e’tirof etdi.
Ma’lumot uchun, Ikromxon Najmiddinov 2004—2009-yillarda Namangan viloyati hokimi bo‘lgan. Hozirda viloyat Mahalla va oilani qo‘llab-quvvatlash boshqarmasi boshlig‘ining o‘rinbosari, “Keksalarni e’zozlash” jamoat fondi raisi va senator sifatida faoliyat yuritib kelmoqda.
U 2016-yili O‘zbekiston Prezidentligiga nomzod Shavkat Mirziyoyevning ishonchli vakili bo‘lgandi. 2017-yilda Prezident farmoniga asosan “El-yurt hurmati” ordeni bilan taqdirlangan.
Izoh (0)