Turkmanistonga 9-may kuni Xitoyning Sinovac kompaniyasi tomonidan ishlab chiqarilgan CoronaVac koronavirusga qarshi vaksinasi keltirildi. Bu haqda Turkmanistonning Orient axborot agentligiga tayanib, “Interfaks” xabar berdi.
“Yetkazilgan vaksinalar Turkmaniston Sog‘liqni saqlash va tibbiyot sanoati vazirligi qoshidagi Davlat sanitariya-epidemiologiya xizmatining Jamoat salomatligi va oziq-ovqat markazida, shuningdek, JSST va YuNISEF tavsiyalariga muvofiq vaksina saqlanishi uchun zarur shart-sharoitlar yaratilgan Ashxobod va boshqa hududiy bo‘linmalarning sanitar-epidemiologik xizmatlar markazida saqlanmoqda”, — deyiladi xabarda.
Dunyoda koronavirus pandemiyasiga qarshi kurash sharoitida, avvalroq Turkmanistonga Rossiyaning “Sputnik V” va “EpiVakKorona”, shuningdek, Xitoyning “Biovak” vaksinalari yetkazilgan edi. Mamlakatda koronavirus bilan kasallanish xavfi yuqori bo‘lganlar guruhiga kiruvchi aholi qatlamini emlash boshlangan, deb yozmoqda agentlik.
Avval xabar berilganidek, 2021-yilning aprel oyida Gurbanguli Berdimuhamedov mamlakatning o‘tkir yuqumli kasallikka qarshi kurashish va tezkor choralar ko‘rishga tayyorgarlik rejasini tasdiqladi. Reja o‘ta xavfli yuqumli kasalliklar tarqalishiga qarshi kurashish bo‘yicha kompleks tadbirlar tashkil etish, shuningdek, Turkmanistonning Birlashgan Millatlar Tashkiloti, uning ixtisoslashgan muassasalari va JSST bilan hamkorligini kengaytirish maqsadida tuzildi.
Turkmanistonning rasmiy idoralari koronavirus bilan kasallanish holatlarini tasdiqlamagan bo‘lsa-da, mamlakatda tibbiy niqob taqish tartibi joriy etilgan va xalqaro aviaqatnovlar to‘xtatilgan.
JSST mamlakatda pnevmoniya bilan kasallanish ko‘payganidan xavotirda ekanini bildirdi va hukumatga koronavirus allaqachon butun mamlakat bo‘ylab tarqalganidagidek zarur choralarni ko‘rishni tavsiya qildi.
Avvalroq onlayn shaklda bo‘lib o‘tayotgan 2021-yilgi Jahon vaksinasi kongressi mutaxassislari koronavirusga qarshi eng yaxshi vaksina sifatida Amerikaning Moderna kompaniyasi preparatini tanladi.
Kanada esa Amerikaning Johnson & Johnson kompaniyasiga tegishli koronavirus vaksinasidan foydalanishni vaqtincha to‘xtatdi. Qaror Kanadaga kirib kelgan preparatning dozalari Baltimordagi American Emergent zavodida ishlab chiqarilgani ma’lum bo‘lgandan keyin qabul qilindi. Avvalroq The New York Times gazetasi ushbu zavodda 15 million doza Johnson & Johnson vaksinalari yaroqsiz holga kelib qolgani haqida xabar bergan edi.
Izoh (0)