“Yunusobod fojiasi” qurbonlaridan birining yaqinlari va qurilish kompaniyasi o‘rtasidagi kompensatsiya mojarosini apellyatsiya tartibida ko‘rib chiqish jarayoni yakuniga yetdi

2019-yilning 18-dekabrida yuz bergan “Yunusobod fojiasi”da halok bo‘lgan olti ishchi orasida yakkabog‘lik Anvar Diyorov ham bor edi. Respublika maxsus komissiyasining 2020-yil 31-yanvar kungi dalolatnomasiga asosan, har bir jabrdiyda singari marhum Anvar Diyorovning ham xonadoniga 261,9 million so‘m bir martalik tovon puli to‘langan. Dastlab 100 million so‘m, 2020-yil sentabrida esa 161 million so‘m plastik kartaga tushgan.

Ammo marhumning bevasi Lobar Rahmonova boquvchisini yo‘qotgani uchun berilgan tovon puli to‘liq emas, deb hisoblab, qaynatasi va qaynakasi bilan birga turmush o‘rtog‘i ishlagan SBK Universal Construction Group qurilish kompaniyasiga nisbatan fuqarolik ishlari bo‘yicha Mirzo Ulug‘bek tumanlararo sudiga da’vo arizasi kiritgan.

Sudda Lobar Rahmonova oilaning farzandlari uchun tayinlangan har oylik kompensatsiya va bir martalik nafaqa umuman to‘lanmaganini qayd etgan. Shuningdek, u marhum umr yo‘ldoshining vafoti tufayli yetkazilgan ma’naviy zarar uchun to‘lov undirishni ham so‘ragan.

Sudning 2020-yil 27-noyabrdagi hal qiluv qaroriga ko‘ra, javobgar SBK Universal Construction Group’dan da’vogar Lobar Rahmonovaning uch nafar farzandining har biriga 16 yoshga to‘lgunga qadar hamda eng kichik farzandi 3 yoshga to‘lguniga qadar uning o‘ziga ham, ya’ni Lobar Rahmonovaga har oyda 727 ming so‘mdan kompensatsiya, 100 million so‘m bir martalik kompensatsiya va yetkazilgan ma’naviy zarar uchun 300 million so‘m kompensatsiya undirish belgilangan.

Da’vogar Lobar Rahmonovaning advokati Asliddin Mahammadiyevning “Daryo”da 2021-yil 8-aprel kuni e’lon qilingan “Tuproq qazib, tuproqlar ostida qolgan bolam”. Yunusobod metrosidagi fojia qurbonlari yaqinlarining o‘tgan bir yildagi hayoti va kompensatsiya muammolari haqida” nomli maqolada ta’kidlashicha, sud qarori 2020-yil 17-dekabrda qonuniy kuchga kirgan bo‘lsa-da, javobgar tomon yanvarda ham ijroni ixtiyoriy ravishda amalga oshirmagach, majburiy undirish choralarini ko‘rishga to‘g‘ri kelgan. Shu asosda kompaniya bank hisob raqamlari va mol-mulklariga taqiq qo‘yilgan. Oradan biroz vaqt o‘tib, marhum Anvar Diyorovning oila a’zolariga 100 million so‘m pul o‘tkazilgan.

Advokatning aytishicha, shundan keyin SBK Universal Construction Group negadir “da’vo bo‘yicha hal qiluvchi qarorini olmadim”, degan vaj bilan fevral oyida sudga murojaat qilgan. “Holbuki da’vo muddati bo‘yicha 20 kun ichida appelyatsiya berishi kerak edi", — deydi advokat Mahammadiyev. Ma’lum bo‘lishicha, javobgar tomon kassatsiya tartibida shikoyat berishga qonuniy haqi qolmagani bois apellyatsiya shikoyatining muddatini tiklash haqida fuqarolik ishlari bo‘yicha Mirzo Ulug‘bek tumanlararo sudiga ariza bergan.

“Daryo” muxbiri Mirolim Isajonovning xabar berishicha, 5-may kuni fuqarolik ishlari bo‘yicha Toshkent shahar sudida ushbu masalani apellyatsiya tartibida ko‘rib chiqish jarayoni yakuniga yetib, sud qaror qabul qildi.

Sudda marhum Anvar Diyorovning ukasi Navro‘z Eshonto‘xtarov guvoh sifatida Jinoyat ishlari bo‘yicha Xiva tuman sudi binosidan videokonferensaloqa shaklida ishtirok etdi. U sudyaning savollariga javob berarkan, xususan, shunday dedi:

“Dafn marosimi kuni kimdir 100 million so‘m pul berib ketdi. Ammo biz shuncha mablag‘ kim tomonidan kimga berilganini aniq bilmaymiz. Chunki o‘sha kuni akamning hamma yaqinlari qattiq tushkunlikda edik, ta’ziyaga kelgan odamlar bilan ovora bo‘lganmiz. Keyinroq 100 million so‘m davlat tomonidan berilganini matbuot orqali bildik. Keyin bu pulni kompaniya biz berdik, dedi.

100 million so‘mdan dafn marosimlariga ishlatganmiz, hozir undan qancha qismi qolganligini aniq bilmayman. Bu puldan yangamga ham berilgan. Pul bo‘yicha yaqinlar oramizda o‘zaro nizo, tushunmovchiliklar yo‘q. Ota-onamning mazkur sud jarayonidan xabari bor.

Biz kompensatsiya va nafaqa puli o‘z vaqtida berilishi bo‘yicha “O‘zbekiston temir yo‘llari”, SBK Universal Construction Group kompaniyasiga bir necha marta murojaat qilganmiz. Ammo harakatlarimiz samara bermay, sarson bo‘lganimiz uchun oxiri advokat yollashga majbur bo‘ldik”, —  dedi marhumning ukasi.

Sud fuqarolik ishlari bo‘yicha Mirzo Ulug‘bek tumanlararo sudining 2020-yil 27-noyabrdagi hal qiluv qaroridagi javobgar SBK Universal Construction Group’dan da’vogar Lobar Rahmonovaning uch nafar farzandining har biriga 16 yoshga to‘lgunga qadar hamda eng kichik farzandi uch yoshga to‘lgunga qadar Lobar Rahmonovaning o‘ziga ham har oyda 727 ming so‘mdan kompensatsiya va yetkazilgan ma’naviy zarar uchun 300 million so‘m kompensatsiya undirishni o‘z kuchida qoldirdi. 100 million so‘m bir martalik kompensatsiya undirish to‘g‘risidagi qarorini bekor qildi.

Eslatib o‘tamiz, mazkur masalani apellyatsiya tartibida ko‘rib chiqish jarayoni: birinchi sud majlisi 2021-yil 30- aprel kuni o‘tkazilgan edi. Sudda SBK Universal Construction Group kompaniyasi advokati da’vogar Lobar Rahmonovaning uch nafar farzandlarining har biriga 16 yoshga to‘lgunga qadar har oyda 727 ming so‘mdan beriladigan kompensatsiyasi to‘lab borilishini, to‘lovning bu qismiga e’tirozi yo‘qligini aytgan edi. Biroq u Mirzo Ulug‘bek tumanlararo sudining jabrlanuvchining yaqinlariga 100 million so‘m bir martalik kompensatsiya va yetkazilgan ma’naviy zarar uchun 300 million so‘m kompensatsiya undirish to‘g‘risidagi qarorini bekor qilishini so‘ragandi.

Da’vogar Lobar Rahmonovaning advokati esa quyi sudning qarorini o‘z kuchida qoldirishni so‘rab, shunday fikr bildirgandi.

“Janoza marosimlari uchun deb dastlab 100 million so‘m berilgan. Ammo 100 million so‘mni SBK Universal Construction Group kompaniyasi berganligini tasdiqlovchi hech qanday hujjat yo‘q. Kompaniya hisob raqami yoki buxgalteriyasidan ham pul chiqarilgani to‘g‘risida asoslovchi birorta hujjat mavjud emas.

Anvar Diyorovning yaqinlariga kimdir berib ketgan buncha mablag‘ni kompaniya “biz berganmiz”, deb 2020- yilning avgust oyida marhumning ukasidan tilxat yozdirib olgan. Oradan sakkiz oy o‘tib, tilxat yozdirib olinishi shubhali. Balki, 100 million so‘mni “O‘zbekiston temir yo‘llari” AJ, Vazirlar Mahkamasi yoki hokimiyat vakillari bergandir.

Holbuki maxsus komissiya qarori 2020-yil 31-yanvarda chiqqan va bu qarorda avval berilgan 100 million so‘m hisobga olinsin, deyilmagan. Tergov davomida yoki maxsus komissiya hujjatlarida ham SBK Universal Construction Group kompaniyasi 100 million so‘m berganligi haqida gapirilmagan va yozilmagan”, — dedi advokat.