Qashqadaryo viloyatining Muborak tumani hokimligidagi faoliyati davomida karantinda to‘y qilgan shifokorlar haqida xabar berib, IIB bosimiga uchragan va keyinchalik bosimdan ishdan bo‘shab qutulgan sobiq matbuot kotibi — Zafar Jo‘rayev firibgarlikda ayblanmoqda. Biroq u sudda aybi biror-bir dalil bilan asoslanmayotganini aytib, haqiqat talab qilmoqda, deya xabar berdi “Daryo” muxbiri.
Ta’kidlanishicha, ishga joylashtirish va fuqaroga yer olib berishni va’da qilib, katta miqdorda pul olganlikda ayblangan Muborak tumani hokimining sobiq matbuot kotibi Zafar Jo‘rayev Jinoyat ishlari bo‘yicha Koson tuman sudining 2021-yil 11-martdagi hukmiga ko‘ra, ikkita epizod bo‘yicha oqlangan. Biroq ma’lum bir haq evaziga yer olib berishni va’da qilishda ayblanib, 2 yil 6 oy muddatga axloq tuzatish bilan jazolangan.
“Koson tuman sudiga qadar tergovda menga uchta epizod bo‘yicha ayblov qo‘yildi. Tergov davomida IIBning Bekzod ismli tergovchisi tomonidan tahqirlandim. Qiynoqqa solindim. Tergovchi ochiqchasiga karantindagi to‘y haqida xabar berganimni, bu esa ularga qimmatga tushganini eslatib, qiynoqqa solishda davom etdi. O‘sha paytda bu haqda mas’ullarga bildirib, tergovga bormasligimni, agar tergovga majburlab olib borishsa, o‘zimga biror nima qilib qo‘yishimni aytdim. Xayriyat, o‘sha payt tergovchini o‘zgartirishdi. Sudda menga qo‘yilgan uchta epizodning ikkitasi asoslanmadi. Va sudda bu ayblovlarni olib tashlashdi. Ammo yer olib berish evaziga o‘zgalardan pul olganlikda ayblashib, 2 yil 6 oy muddatga axloq tuzatish bilan jazolashdi. Lekin asos ko‘rsata olishmadi. Sudyadan bu haqda so‘raganimda, shu ish bo‘yicha jinoyat ishi ochilganini, yetarli asos bo‘lmasa-da, jazo tayinlashga majburligini aytdi. Shuning uchun sizga murojaat qildim. Siz adolatni tiklab bering, deyapman”, — deydi Jinoyat ishlari bo‘yicha viloyat sudida so‘nggi so‘z aytish imkonini olgan Zafar Jo‘rayev.
Ma’lum bo‘lishicha, karantindagi to‘y haqida xabar bergan tuman hokimining sobiq matbuot kotibi fuqarolarni ishga joylashtirish uchun firibgarlik yo‘li bilan ulardan 1 million so‘m va 1,5 ming dollar olishda, shuningdek yer olib berishni va’da qilib, 2 million 400 ming so‘m olishda ayblangan.
“To‘g‘ri, o‘sha paytda endigina ish boshlaganim, qolaversa, oylik maosh kamligi va Qarshi shahridan tumanga qatnab ishlaganim sabab o‘zimga tanish insonlardan qarz olganman. Ammo qarz olish davomida ishga joylashtirish yoki yer olib berishni va’da qilmaganman. Va bu ish mening qo‘limdan kelmasligini, vakolatimga kirmasligini siz ham yaxshi bilasiz. Olgan qarzlarimni o‘sha tanishlarimga qaytardim. Ular ham o‘sha paytdagi bosim sabab meni shunday ayblashganini, tuman hokimligiga ustimdan shikoyat qilib borganda menga qarz berishganini aytganini aytishdi. Biroq, ming afsuslar bo‘lsinki, karantindagi to‘y haqidagi xabarim uchun mas’ul tashkilotlar qahriga uchradim. Menga firibgarlik aybini qo‘yishdi. Qo‘llarida hech qanday asos bo‘lmasa-da, 2 yil 6 oyga axloq tuzatish bilan jazolashdi. Salkam olti oy davomida tergov hibsxonasida aybsiz ushlab terishdi. Menga adolat kerak”, — dedi sobiq matbuot kotibi.
Sobiq matbuot kotibining jinoyat ishlari bo‘yicha Koson tuman sudi hukmidan noroziligini ko‘rib chiqayotgan jinoyat ishlari bo‘yicha Qashqadaryo viloyat sudi Zafar Jo‘rayevga tayinlangan hukmni qisman o‘zgartirishni lozim deb topdi. Unga ko‘ra, Zafar Jo‘rayevga tayinlangan 2 yil 6 oy axloq tuzatish jazosi uning tergov hibsxonasida saqlangan 6 oylik muddatni o‘tagani uchun jazo o‘talgan deb hisoblanishi belgilandi.
“Baribir menda sudlangan degan tamg‘a qolyapti. Shuning uchun sud hukmidan noroziligimni bildirib, Oliy sudga shikoyat kiritaman”, — deydi Zafar Jo‘rayev.
Eslatib o‘tamiz, 2020-yilning 14-aprel kuni Muborakda shifokorlar karantin tartibi amal qilayotganiga qaramay, to‘y o‘tkazgani haqida xabar berilgan edi. Shundan so‘ng bu haqda xabar bergan tuman hokimligi axborot xizmati rahbari Zafar Jo‘rayev yolg‘on axborot tarqatishda ayblangandi.
Zafar Jo‘rayev “Daryo” muxbiri bilan suhbatda IIBdagi so‘roq davomida unga ovqat berishmagani, shu sabab tobi qochganini aytgan, “Bu xabar ortidan bir necha kishi jazolanishini bilgan mutasaddilar barcha aybni menga ag‘darib, suvdan quruq chiqishga urinmoqda”, degandi. Mazkur voqealardan so‘ng Muborak tumani hokimi G‘ayrat Jovliyev ham ishdan olindi.
Izoh (0)