Qashqadaryoning Chiroqchi tumani “Qumdaryo” mahalla fuqarolar yig‘ini Oqto‘nli qishlog‘ida yashovchi bir guruh ayollar 23-aprel kuni “Qarshi—Samarqand” yo‘lining “Xo‘jaobod” mahalla fuqarolar yig‘ini Xo‘jaobod qishlog‘i hududidan o‘tuvchi qismini norozilik tariqasida to‘sib qo‘ygan. Bunga ikki kun shu yo‘lni kesib o‘tishga urinish vaqtida yuz bergan yo‘l-transport hodisasida xo‘jaobodlik 1-sinfda o‘quvchi qizning vafot etgani sabab bo‘lgan.
Qashqadaryo viloyat IIB xabariga ko‘ra, 21-aprel kuni A-378 “Samarqand—G‘uzor” yo‘lidan Samarqand tomon harakatlanib kelayotgan Isuzu yuk mashinasi piyodalar yo‘lakchasi orqali yo‘lni kesib o‘tayotgan 1-sinf o‘quvchisi D.E.ni urib yuborgan. Og‘ir tan jarohati olgan bola Chiroqchi tumani “Ko‘kdala” kasalxonasida vafot etgan. IIB axborotida ta’kidlanishicha, holat yuzasidan jinoyat ishi qo‘zg‘atilgan, haydovchi shu kunning o‘zida qamoqqa olingan.
YTHning ertasiga, 22-aprel kuni Chiroqchi tumani mutasaddi rahbarlari fuqarolar bilan uchrashgan. Uchrashuvda “Qumdaryo” mahalla fuqarolar yig‘inida yashovchi aholi o‘zlari yashaydigan qishloqda qurilishi rejalashtirilgan maktabning tezroq qurib berilishini so‘rab, qo‘shni qishloqdagi maktabga borishda “Samarqand—Qarshi” yo‘lini kesib o‘tish bolalar uchun xavfli ekanini bildirgan. Qashqadaryo viloyati hokimligi axborotiga ko‘ra, “Istiqlol” qo‘rg‘onchasida 99-maktab filialiga 176 o‘rinli yangi maktab qurilishi rejalashtirilgani, u yangi o‘quv yili boshlanishida foydalanishga topshirilishi “qishloq ahliga bot-bot tushuntirilgan”.
“Afsuski, ba’zi fuqarolar mutasaddilarning so‘zlariga e’tibor qilmay, o‘z bilganicha ish tutdi”, — deb yozadi vaziyat yuzasidan “Chiroqchi.uz”. Internet-nashrning alohida qayd etishicha, qishloq ayollari 1-sinf o‘quvchisining o‘limidan “o‘zlarini yo‘qotib qo‘ygani” uchun shu ishga qo‘l urgan. Qashqadaryo viloyat IIBning qo‘shimcha qilishicha, qumdaryolik ayollarning maktab qurilishini tezlashtirish talabi bilan 23-aprel kuni yo‘lni to‘sib qo‘yishi oqibatida qisqa muddatga avtomashinalarning harakatlanishi to‘xtagan.
“Shu o‘rinda, viloyat hokimi Zoyir Mirzayev marhuma D.E.ning vafoti munosabati bilan uning oila a’zolariga hamdardlik bildiradi va vaziyatni to‘liq nazoratga olganini hamda yangi maktab qurilishi avgust oyida yakunlanishini ma’lum qilamiz”, — deyiladi Qashqadaryo viloyati hokimligi axborotida. “Chiroqchi.uz”ning qo‘shimcha qilishicha, maktab qurilishi 2021-yil ikkinchi choragida boshlanadi, hozirda buyurtmachi Qashqadaryo viloyati “Yagona injinering xizmati” tomonidan pudratchi tashkilotlar tanlovini o‘tkazish ishlari olib borilmoqda.
Izoh (0)