Singapur hukumati mamlakatga tashrif buyuruvchilarda koronavirusni nafas olish yo‘li orqali aniqlovchi test tizimini yo‘lga qo‘yishni rejalashtirmoqda. Ushbu test moslamalarining aeroportlarga joylashtirilishi belgilangan. Bu haqda “Korrespondent.net” xabar berdi.
Klinik tekshiruvlar vaqtida TracieX qurilmasi natijalarni 95 foiz aniqlikda ko‘rsatdi, bu ko‘rsatkich PZR-testlarining samaradorligi bilan deyarli teng hisoblanadi. Shuningdek, bu tizimda natijalar ikki daqiqa ichida tayyor bo‘ladi va tekshiruvdan o‘tish narxi 20 dollarni tashkil etadi (mavjud har qanday koronavirus testlaridan arzon).
TracieX mamlakatning yuqumli kasalliklar milliy markazida va Changi aeroportida sinovdan o‘tkazilmoqda.
Yoz faslining boshida ushbu qurilmaning keng miqyosda ishlab chiqarilishi rejalashtirilgan.
TracieX yaratuvchilarining so‘zlariga ko‘ra, har bir nafas chiqarishda turli xil biokimyoviy reaksiyalar natijasida inson hujayralarida hosil bo‘lgan uchuvchi organik birikmalar ajralib chiqadi va qurilma nafas olishning kimyoviy tarkibidagi o‘zgarishlarni tahlil qiladi.
Ma’lumot uchun, Qirg‘iziston parlamenti deputatlari koronavirus bilan og‘rigan bemorlarning jung‘or ayiqtovoni (Aconitum soongaricum) zaharli o‘simligi bilan davolanayotgani to‘g‘risida xabar bergan mamlakat sog‘liqni saqlash vaziri Alimqodir Beyshenaliyevning ishdan olinishini talab qilmoqda.
Shuningdek, Angela Merkel Germaniyadagi vaksinatsiya haqida gapirar ekan, jarayon muvaffaqiyatli kechayotganini va “tunnel oxiridagi yorug‘lik”ni ko‘rayotganini ta’kidladi.
Avvalroq Merkel Yevroittifoq davlatlari rahbarlari bilan o‘tkazilgan uchrashuvdan keyingi bayonotida Yevropa Ittifoqi mamlakatlari yaqin kelajakda koronavirusga qarshi emlanganlik to‘g‘risida raqamli sertifikatlar yaratishga kelishib olganini ma’lum qilgan edi.
Izoh (0)