Karyerasini modellikdan boshlagan mashhur aktrisalar (foto)

Braziliyalik supermodel, Victoria’s Secret yuzi Alessandra Ambrosio bu yil o‘zining 40 yoshini nishonlaydi. U nafaqat podiumdagi muvaffaqiyatli ishtiroki bilan ko‘plab brendlarning yuzi bo‘ldi, balki filmlarda ham rol ijro etdi. Faoliyatini modellikdan boshlab, so‘ngra kino olamiga qadam qo‘ygan bunday aktrisalar talaygina. Shulardan ba’zilari haqida ma’lumot beramiz.

Alessandra Ambrosio

Ambrosio Braziliyaning janubidagi kichik shaharchada tug‘ilgan va model bo‘lishni sakkiz yoshidan beri orzu qilgan. U faoliyatini 12 yoshida boshlagan va ko‘p o‘tmay Elle jurnalining muqovasida surati chiqqan. Hozirda u Victoria’s Secret’ning eng mashhur modellaridan biri.

Ambrosio, shuningdek, Fergi va Kanye Uest kliplarida ham suratga tushgan. Shundan so‘ng model o‘zini kinoda ham sinab ko‘rgan — “Royal kazinosi” filmida tennischi qiz rolini ijro etgan. Keyinchalik esa “Salom, Yangi yil!” komediyasi, “Amerikalik uy bekasi” ekshn-komiksida rol o‘ynagan.

Olga Kurilyenko

Avval podiumda tanilib, keyin o‘zini kinoda sinab ko‘rgan yana bir model — Olga Kurilyenko.

Daniyel Kreyg bilan “Shavqat kvanti” filmida mos juftlikka aylanishdan avval, Olga Parij podiumida o‘z faoliyatini boshlagan. U Clarins va Helena Rubinstein yuzi, Roberto Cavalli va Kenzo modeli bo‘lib, shuningdek, mashhur jurnallar muqovasida tez-tez ko‘rinish bergan.

Ammo keyinchalik u aktrisa bo‘lishga qaror qildi: avval “So‘qqabosh sevgi” filmida, so‘ngra “Hitman” filmga moslashtirilgan kompyuter o‘yinlarida, keyinchalik esa bondianada rol ijro etgan.

Olganing aktrisalik iste’dodini payqagan rejissorlar uni “Senturion” tarixiy trilleriga taklif qilishgan. Kurilyenko Terrens Malik, Juzeppe Tornatore, Terri Gilliam singari mashhur rejissorlar bilan ishlagan.

Milla Yovovich

Olganing kelib chiqishi rus bo‘lgan modellikdagi hamkasbi — Milla Yovovich ham model sifatida karyerasini to‘qqiz yoshida boshlagan: L’Oreal, Revlon va Versace kampaniyalarida ishtirok etgan. Bundan tashqari, Ugo Boss, Gess, Calvin Klain bilan hamkorlik qilgan va kino olamiga qadam qo‘ygan.

Milla aktrisalik faoliyatini kichik rollardan boshlagan, ammo uni fransuz rejissori Lyuk Besson mashhur qildi. U Millaga “Beshinchi element” filmidagi bosh rolni berdi va uni darhol kinoyulduzga aylantirdi. Chunki tomoshabinlarga qizil sochli o‘zga sayyoralik qiz obrazi yoqib qolgandi.

Bunday muvaffaqiyatdan so‘ng “Yovuzlik maskani”, “Mushketyorlar”, “Ultrabinafsha” filmlaridagi roli uning mashhurligini yanada mustahkamladi.

Diana Kryuger

Yana bir model Diana Kryuger ham “Beshinchi element” filmidagi rol uchun kastingda qatnashgan. U allaqachon mashhur model bo‘lsa-da, bu rol unga nasib qilmadi. Bungacha u Christian Dior, Yves Saint Laurent, Dolce & Gabbana va Armani bilan hamkorlik qilgan. Kastingdan o‘tolmagani esa uni xafa qilmagan, chunki Bessonning o‘zi Dianaga familiyasini Haydkryugerdan talaffuzi osonroq Kryugerga almashtirishni va modellikdan ko‘ra kinoga ko‘proq e’tibor qaratishi lozimligini tavsiya qilgan.

Keyinchalik Diana aktyorlik kursini o‘tab, Orlando Blum bilan “Troya” tarixiy filmida, Nikolas Keyj bilan esa “Millat xazinasi” sarguzasht-jangari filmida rol ijro etdi. 2017-yilda “Chegarada” filmidagi roli uchun Kann kinofestivalining “Eng yaxshi aktrisa” mukofotiga sazovor bo‘ldi.

Sasha Luss

Rejissor Lyuk Bessonni modellar orasida aktyorlik qobiliyatining asosiy “kashfiyotchisi” deyish mumkin.

Magadanning eng yaxshi modeli hisoblangan Sasha Luss uchun Besson filmidagi obrazi uning debyut roli bo‘lgan. Models.com saytidagi ma’lumotlarga ko‘ra, u eng talabgir modellardan biri hisoblanadi. U Pirelli taqvimi uchun suratga tushgan, Chanel bilan hamkorlik qilgan, Dior Beauty, Carolina Herrera tarmog‘ining yuzi bo‘lgan bo‘lsa-da, kinoda rol o‘ynashni orzu qilardi.

Rejissor Besson avvaliga unga “Valerian va ming sayyora” filmidagi epizodik rolni berdi, bir necha yildan so‘ng ijodkor “Anna” ekshn-trilleri filmini suratga oldi. Filmda Sasha asosiy qahramon roliga tasdiqlandi. U bilan birga Killian Merfi, Lyuk Evans, Aleksandr Petrov ham birga rol ijro etgan.

Irina Sheyk

Yana bir rossiyalik model — Irina Sheyk nafaqat Armani, Lacoste, La Perla yoki Givenchy vakili hisoblanadi, balki bir nechta filmlarda ham rol o‘ynagan.

Irina avvaliga Intimissimi brendining yuziga aylandi. Shuningdek , u Sports Illustrated Swimsuit Issue nashrining muqovasida chiqqan ilk rus modeli, L’Oreal Parij brendining elchisi va podiumlarda barchani maftun etgan model edi. Keyinchalik u “Agent” qisqa metrajli filmida, “Gerakl” blokbasterida suratga tushdi. Filmda u bosh qahramon Dueyn Jonsonning rafiqasi rolini o‘ynagan.

Monika Belluchchi

Jozibador Monika Belluchchi ham karyerasini model sifatida boshlagan. Modellikni u o‘qish pulini to‘lashi uchun boshlagan. Ammo birin-ketin takliflar tusha boshlagach,Valentino, Prada, Ferretti, Germes, Revlon brendlari bilan hamkorlik qilgan.

Monika kinodagi faoliyatini italyan komediyalaridan boshlagan, uning ingliz tilidagi debyut filmi Frensis Ford Kopolaning “Drakula” edi. Shundan so‘ng Monika boshqa yulduzlar qatori Gollivud loyihalariga taklif qilindi.

Keyinchalik uning “Malena” filmidagi ijrosi katta shov-shuvga sabab bo‘ldi. “Asteriks va Obeliks” filmidagi Kleopatra, “Aka-uka Grimmlar” filmidagi malika va “007: Spektr” filmidagi Bondning rafiqasi rollari uning muvaffaqiyatini yanada mustahkamladi.

Shunga qaramay Belluchchi modellik faoliyatini ham to‘xtatib qo‘ymadi: u Dolce & Gabbana bilan hamkorlik qilishni va fotosessiyalarda ishtirok etishni davom ettirdi.