Davlat soliq qo‘mitasi Toshkent viloyati Olmaliq shahrida sotuvchilarning buyumlarini zo‘rlik bilan tortib olgan soliqchilar aks etgan videodagi holat bo‘yicha tezkor tekshiruv o‘tkazilganini ma’lum qildi.
Ma’lum qilinishicha, Olmaliq shahar davlat soliq inspeksiyasining 11 nafar xodimi, jumladan, voqeada bevosita ishtirok etgan uch nafar soliq inspektori ishdan bo‘shatilgan va ularning barcha maxsus unvonlari bekor qilingan. Shu bilan birga, Toshkent viloyati Davlat soliq boshqarmasi boshlig‘iga hamda Olmaliq shahar davlat soliq inspeksiyasi boshlig‘iga hayfsan berilgan.
Sotuvchilarning buyumlarini tortib olgan soliq xizmatining sobiq xodimlari qilgan ishlaridan pushaymon ekanliklarini ta’kidlab, uzr so‘ragan.
Bundan tashqari, “Soliqchi-ko‘makchi” tamoyili asosida shu paytga qadar noqonuniy faoliyat yuritgan fuqarolarga tegishli huquqiy yordam ko‘rsatilib, faoliyati qonuniylashtirilgan. Ularga Olmaliq shahridagi savdo markazidan tegishli joy ajratib berilgan. “Shuningdek, kredit olishda amaliy yordam ko‘rsatilib, ulardan biriga tikuv mashinasi hadya etildi”, — deyiladi xabarda.
Avvalroq Davlat soliq qo‘mitasi raisi Sherzod Kudbiyev Olmaliqda sotuvchilarning buyumlarini tortib olgan soliq xizmatchilari aks etgan video yuzasidan murojaat qilib, xalqdan bu voqea uchun uzr so‘ragandi.
Izoh (0)