Namanganda 2021-yil birinchi choragida hokimlarning 30 dan ortiq qarori haqiqiy emas deb topildi

Namangan viloyatida 2021-yilning birinchi choragida hokimlar qarorlarini haqiqiy emas deb topish bilan bog‘liq 72 ta ish ko‘rib chiqildi. Bu haqda “Daryo”ga viloyat ma’muriy sudi raisi Salohiddin Tursunov ma’lum qildi.

Tursunovning aytishicha, 2020-yil birinchi choragida bu ko‘rsatkich 60 tani tashkil etgandi.

Ma’muriy sudlar uch oy davomida hokimlarning jami 32 ta qarorini haqiqiy emas deb topgan. Jumladan, Namangan shahar hokimining 12 ta, Pop tumani hokimining 7 ta qarori yuzasidan shunday xulosaga kelingan.

“Shuningdek, birinchi chorak davomida hokimiyat mansabdor shaxslari harakati yoki harakatsizligini qonunga xilof deb topish bilan bog‘liq 9 ta ish ko‘rib chiqildi. Ularning 6 tasi qanoatlantirildi”, — deydi Salohiddin Tursunov.

Namanganda ma’muriy sudlar tomonidan joriy yil uch oyi mobaynida mazkur toifadagi ishlar bo‘yicha qonunbuzilish holatlariga yo‘l qo‘ygan mansabdor shaxslarga nisbatan 25 ta xususiy ajrim chiqarilgan. Bu o‘tgan yilning shu davriga nisbatan ikki baravar ko‘p.