O‘zbekiston Prezidenti Shavkat Mirziyoyevning yaqin oylar ichida Rossiya va Janubiy Koreyaga tashrif buyurishi kutilmoqda. Bu haqda davlat rahbari matbuot kotibi Sherzod Asadov 9-aprel kuni o‘tkazilgan brifingda so‘z yuritdi, deya xabar bermoqda “Daryo” muxbiri.
“Bu hafta tadbirlarga boy bo‘ldi. Davlatimiz rahbari xorijiy delegatsiyalarni qabul qildi, muhim yig‘ilishlar o‘tkazdi.
Xususan, 5-aprel kuni Prezidentimiz Rossiya Federatsiyasi sanoat va savdo vaziri Denis Manturov boshchiligidagi delegatsiyani qabul qildi.
Yaqinda Toshkentda ilk bor “Innoprom” yirik sanoat haftaligi bo‘lib o‘tdi. Ushbu ko‘rgazmada mamlakatimiz korxonalari ishlab chiqarayotgan mahsulotlar rossiyalik ishbilarmonlarda katta qiziqish uyg‘otdi.
Uchrashuvda mazkur ko‘rgazma yangi kooperatsiya loyihalarini boshlash uchun ishonchli platforma bo‘lib xizmat qilishi qayd etildi. Bu boradagi loyihalar aniq muhokama qilindi. Ularni amalga oshirishda O‘zbekiston Investitsiyalar va tashqi savdo vazirligi hamda Rossiya Sanoat va savdo vazirligi o‘rtasida tashkil etilgan Loyiha ofisi muhim o‘rin tutadi.
Joriy yilda epidemiologik vaziyatdan kelib chiqib Prezidentimizning Rossiyaga rasmiy tashrifini tashkil etish rejalashtirilayotgani, bo‘lajak muzokaralarga tomonlar puxta tayyorgarlik ko‘rayotgani qayd etildi.
6-aprel kuni bo‘lib o‘tgan Koreya Respublikasi parlamentining Milliy assambleya Spikeri Pak Byon Sok boshchiligidagi delegatsiya bilan muloqotda mamlakatlarimiz ko‘p qirrali va o‘zaro manfaatli hamkorlikni mustahkamlashda qat’iy ekanliklari ta’kidlandi.
O‘zbekiston Seulning yangi shimoliy siyosatini va Koreya yarimorolida mustahkam tinchlik o‘rnatish borasidagi sa’y-harakatlarini to‘liq qo‘llab-quvvatlashi ta’kidlandi.
Mamlakatimiz Janubiy Koreya parlamentining, eng avvalo, hududlar va qishloq joylarni rivojlantirish, kambag‘allikni qisqartirish, industriallashtirish va raqamlashtirish bo‘yicha samarali tajribasini o‘rganishdan manfaatdor.
Janubiy Koreya parlamenti nufuzli delegatsiyasining tashrifi O‘zbekiston Prezidentining ushbu mamlakatga tashrifiga tayyorgarlik ko‘rishning bosqichlaridan biri bo‘ldi, deb aytish mumkin”, — dedi Asadov.
Izoh (0)