AQShning Alabama shtatida sodir bo‘lgan tornado oqibatida kamida besh kishi halok bo‘ldi. Bu haqda ABC telekanaliga tayanib “Korrespondent.net” xabar berdi.
AQShning Milliy meteoroliya xizmati ma’lumotlariga ko‘ra, shtatda yettita tornado qayd qilindi. Tornado Pelxem shahridagi 30 tadan 50 tagacha uylar va inshootlarga zarar yetkazdi. Oqibatda janubi-sharqda 55 mingga yaqin aholi, shu jumladan, Alabamada 36 mingdan ortiq kishi elektr energiyasiz qoldi.
Meteorologlar Birmingem shahridan janubda va sharqda joylashgan tumanlarda, shuningdek, Shelbi va Jefferson okruglarida favqulodda holat e’lon qildi.
Tornado xavfi shtatning shimoliy qismida, shu jumladan, Birmingem, Taskalusa va Xantsvillda saqlanib qolmoqda.
Avvalroq AQSh Milliy meteoroliya xizmatining profil bo‘limi Alabama, Missisipi va Tennessi shtatlarida tornado xavfidan ogohlantirgan edi. Alabamada tabiiy ofat Elisvill yaqinidagi hududdan boshlandi.
Tennessi va Kentukki shtatlarida shamolning tezligi soatiga 80 milga yetishi mumkin, juda kuchli do‘l yog‘ish ehtimoli bor. Yarim tunda Atlantada, shuningdek, O‘rta Atlantika va Ogayo vodiysi hududlarida talafotli shamol bo‘ronlari bo‘ladi. Bundan tashqari, aholi suv toshqini ehtimoli haqida ogohlantirildi.
Yanvar oyining oxirida Alabama shtatining unchalik katta bo‘lmagan shahrida tornado sodir bo‘ldi. Kuchli bo‘ron Fultondeyl shahridagi (Jefferson okrugi, Alabama shtati) mehmonxonani butunlay vayron qildi va xususiy uylarga zarar yetdi, daraxtlar qulab tushdi.
Izoh (0)