Polshada umummilliy karantin joriy qilindi

Polshada 20-martdan 9-aprelgacha qat’iy karantin joriy qilindi. Yangi karantinning boshlanishi haqida 17-mart kuni mamlakat sog‘liqni saqlash vaziri Adam Nedzelskiy xabar bergan edi, deb yozmoqda “Interfaks”.

Shu vaqtga qadar bu kabi qat’iy cheklovlar mamlakatning bir nechta hududlarida amal qilayotgan edi, lekin endi Polshaning barcha hududi uchun joriy qilindi.

Karantin davrida mehmonxonalar, savdo markazlaridagi ko‘plab do‘konlar, dam olish maskanlari, kinoteatrlar, muzeylar, shuningdek, basseyn va sport majmualari faoliyati to‘xtatiladi. Maktab o‘quvchilari darslarini masofaviy tarzda davom ettiradi.

Nedzelskiy pandemiyaga qarshi kurashda masofadan turib ishlash muhimligini ta’kidladi va ish beruvchilarni iloji boricha tezroq masofaviy shaklga o‘tishga chaqirdi. “Biz har kuni tirbandliklarga qarab kuzatayotgan harakatning intensivligi va gavjumligidan xavotirdamiz. Men barcha ish beruvchilarga murojaat qilyapman, barcha davlat idoralarining ish beruvchilari, iloji boricha tezroq masofaviy ish tartibiga o‘ting”, — dedi vazir.

Koronavirus bilan kasallanganlar soni bo‘yicha Polsha dunyoda 14-o‘rinda. Mamlakatda 2 milliondan ortiq aholi koronavirus bilan kasallangan, 48 ming kishi virus qurboniga aylangan. Kasallanish nisbati bo‘yicha esa 44-o‘rinda turibdi — bir million kishiga 53 mingta virusga chalinish holati. O‘lim holatlari nisbati bo‘yicha esa 27-o‘rinda — bir million kishiga 1291 ta o‘lim holati.

Ma’lumot uchun, Polshada o‘tgan yili 1946-yildan buyon maksimal darajada ko‘p inson vafot etdi. Salkam 477 ming kishi vafot etgan — bu 2019-yilgi ko‘rsatkichlarga qaraganda taxminan 67 mingga ko‘p. Dastlabki ma’lumotlarga ko‘ra, Polsha aholisi 2020-yil oxiri hisoblari bo‘yicha 38 million 268 mingni tashkil etmoqda. Mamlakat aholisi 2019-yil bilan taqqoslanganda 115 ming kishiga kamaygan.

Avvalroq fevral oyidan Polshadan chiqarib yuborilgan Rossiyaning Poznan shahridagi bosh konsuli Igor Oshepkov koronavirus bilan kasallangani va fuqarolarning hayotini xavf ostiga qo‘yib, o‘zini izolyatsiya qilmagani haqida xabar berilgan edi.