Fransiyada koronavirusni aniqlovchi testlar sotila boshlaydi

Fransiyada shu haftadan organizmdagi koronavirus bor-yo‘qligini mustaqil ravishda aniqlash uchun testlar sotila boshlaydi. Bu haqda Fransiya Sog‘liqni saqlash boshqarmasi direktori Jerom Salomonga tayanib “Korrespondent.net” xabar berdi.

Uning so‘zlariga ko‘ra, testlarni dorixona va supermarketlardan sotib olish mumkin.

Salomonning ta’kidlashicha, test natijalari ijobiy chiqqan odamlarning o‘zgalar bilan aloqa zanjirini kuzatib borish eng asosiy qiyinchilik hisoblanadi.

Koronavirusga qarshi test topshiruvchilar natijalar haqida ma’lumot berishi kerak, aks holda salbiy oqibatlarga olib kelishi mumkin, deb qo‘shimcha qildi boshqarma direktori.

Ma’lumot uchun, pandemiya boshlangandan buyon Fransiyada 4 milliondan ko‘proq odamda koronavirus aniqlandi, ularning 90 mingdan ortig‘i vafot etdi.

Fransiya 2020-yilning may oyidan beri maktablarni deyarli yopmadi. Ta’lim muassasalarida qat’iy sanitar-epidemiologik choralar joriy qilingan. 25-fevral kuni bosh vazir Jan Kasteks fransuz hukumatining shunday uzoq muddat davomida maktablarning kunduzgi faoliyatini to‘xtatmay “yaxshi qaror” qabul qilganini ta’kidladi. Xususan, 31-yanvardan boshlab Fransiya Yevropa Ittifoqiga a’zo bo‘lmagan mamlakatlardan keluvchilar uchun mamlakatga kirishni taqiqladi.

Avvalroq Germaniyada mart oyining oxiridan boshlab vaksinatsiya nafaqat maxsus emlash markazlarida, balki xususiy tibbiy klinikalarida amalga oshirilishi haqida xabar berildi. Ta’kidlanishicha, Germaniya hukumati aholini tezroq emlash uchun shunday qarorga keldi.