Avstraliyalik qiz ijtimoiy tarmoqlarga to‘rtta panjasida harakatlanayotgan kenguruning videosini joylashtirib, ko‘plab foydalanuvchilarni eng qo‘rqinchli holatlar va tushlarini yodga olishga majbur qildi, deb yozadi Esquire.
Keti ismli qiz TikTok’dagi sahifasiga ish joyi yaqinida yuradigan kenguruning roliklarni tez-tez joylashtirib turadi. 9-mart kuni u internetda keng muhokamalarga sabab bo‘lgan rolikni joylashtirgan. U hozirga qadar 527 ming martadan ortiq ko‘rilgan, 102 mingdan ortiq layk to‘plagan va video ostiga ko‘plab izoh qoldirilgan.
Kenguruning to‘rt oyoqda harakatlanishi boshqa to‘rt oyoqlilarnikidan farq qiladi. Videoda u orqa panjalariga tayangan holda sekin engashganini ko‘rish mumkin. Keti uni yaxshi yoritilmagan, tor koridorda videoga olgani sabab tasvirda u xuddi o‘zga sayyoralik maxluq yoki kiborgga o‘xshab qolgan.
Rolik ostidagi izohlarda to‘rt panjasida harakatlangan kenguru qo‘rqinchli filmlardagi sahnalarga, shuningdek, Boston Dynamics’ning robotlariga qiyoslanmoqda.
Avvalroq Riga hayvonot bog‘iga tashrif buyuruvchilar orqasi bilan issiq polda yotgan kenguruning sog‘lig‘idan xavotirlanib, politsiya chaqirgani to‘g‘risida xabar berilgandi.
Izoh (0)