Fevral oyi oxirida Da Vinci Capital sarmoyadorlari Pavel Durovga Telegram Open Network (TON) Inc va Telegram Inc kompaniyalariga qarshi da’vo ochish niyati haqida bildirishnoma xati yubordi. Bu haqda Forbes nashriga tayanib Meduza xabar berdi.

Foto: Tech Crunch

Bildirishnoma, shuningdek, Telegram vitse-prezidenti Ilya Perekopskiy va TON kompaniyasining boshqa yuqori ish boshqaruvchilari va advokatlariga yuborildi.

Forbes ma’lumotlariga ko‘ra, investorlar TON blokcheyn platformasining muvaffaqiyatsiz loyihasi uchun 100 million dollar miqdorida tovon puli talab qilmoqda. Agar kompensatsiya rad etilsa, investorlar ikki hafta ichida London sudiga murojaat qiladi. Telegram’ning yuqori rahbariyatiga yaqin bo‘lgan yana ikkita manba kompaniya ushbu xatni olganini tasdiqladi, ammo da’volar miqdorini  20 million dollar deb aytdi.

Mazkur manbalarda aytilishicha, kompaniyaga xat Da Vinci Capital’ga qarashli Disruptive Era Fund (DEF) tomonidan yuborilgan. Unga ko‘ra, jamg‘arma 20 million dollar to‘lashni taklif qilmoqda, bu DEF tomonidan dastlab kiritilgan va qaytarilgan summa o‘rtasidagi farqni tashkil qiladi.

Jamg‘arma egalaridan biri va Da Vinci Capital kompaniyasining boshqaruvchi hamkori Oleg Jelezko jurnalistlarga izoh berishdan bosh tortdi. Telegram vitse-prezidenti Ilya Perekopskiy ham savollarga javob bermadi.

Disruptive Era Fund — TON loyihasining eng yirik sarmoyadorlaridan biri. Jamg‘arma Telegram bilan 72,1 million dollarlik tokenlarni sotib olish to‘g‘risida shartnoma tuzgan va 2018-yilda kompaniyaning hisob raqamlariga 45,4 million dollar o‘tkazgan.

VTimes nashri ma’lumotlariga ko‘ra, 30-aprelga qadar Telegram kompaniyalari guruhi TON blokcheyn platformasi investorlariga deyarli 626 million dollar qaytarishi kerak. Bu haqda guruhning 2018–2020-yillarga mo‘ljallangan moliyaviy hisobotida ko‘rsatilgan.

“Kommersant” nashrining yozishicha, qarzni qoplash uchun Telegram cheklangan miqdordagi sarmoyadorlar orasida besh yillik muddatga obligatsiyalar joylashtirish orqali milliard dollar yig‘ishni mo‘ljallamoqda.