O‘zbekistonlik FIFA referisi Valentin Kovalenko hakamlik faoliyatini yakunladi

FIFA referisi Valentin Kovalenko hakamlik faoliyatini yakunladi. Bu haqda O‘FA matbuot xizmati ma’lum qildi.

Endilikda Kovalenko hakamlar instruktori sifatida faoliyat yuritadi. O‘FA birinchi vitse-prezidenti Ravshan Ermatov sobiq hamkasbiga O‘FA maxsus sovrinini topshirdi va uning kelgusidagi faoliyatiga omad tiladi.

45 yoshli Kovalenko 2002-yilda FIFA hakamiga aylangandi. U faoliyati davomida O‘zbekiston birinchiliklaridan tashqari, xalqaro maydonda Osiyo Chempionlar Ligasi, OFK Kubogi kabi musobaqalar, shuningdek, terma jamoalar miqyosida Osiyo Kubogi saralash va final bosqichi, Jahon Chempionatlari saralash bosqichlarida o‘yinlarni boshqarib borgan.