AQShda hech kim boqib olishni xohlamagan it yangi egasining hayotini saqlab qoldi (video)

Qo‘shma Shtatlarda Sedi laqabli it yangi egasining hayotini saqlab qoldi. Esquire’ning xabar berishicha, bundan avval bir nechta hayvonlar boshpanasi jonivorni olib qolishni rad etgan.

Sedi odamlarga o‘rgana olmagan, vazni ham taxminan 100 funt (taxminan 45 kilogramm)ni tashkil qilgan. Shu sababli uchta hayvonlar boshpanasi uni boqib olishni xohlamagan.

Nyu-Jersidagi Ramapo-Bergen nomli hayvonlari boshpanasi itga yordam berishga qaror qilgan. “Maqsadimiz — boradigan joyi bo‘lmagan hayvonlarga yordam berish. Sedi ko‘makka muhtoj edi”, — deydi Ramapo-Bergen bosh direktori Megan Brinster.

Oxir-oqibat Sedini Brayan Mayers ismli erkak boqib olgan. Erkakning aytishicha, u bu itni ko‘rib, unga imkoniyat berish kerakligini tushungan.

Erkak avvaliga uni bu muammolardan qutqaryapman deb o‘ylagan, ammo taqdirni qarangki, it uning hayotini saqlab qoldi. Mayersda insult sodir bo‘lganda it uning yonida bo‘lgan va unga telefonga yetib borishiga yordam bergan.

https://twitter.com/lrbarrit/status/1365453472636706818

Uning so‘zlariga ko‘ra, erkak itning bo‘yinbog‘idan ushlab olgan. It uni xona bo‘ylab telefon turgan joygacha sudrab borgan. Mayersning hayron qolganiga sabab jonivor xizmat iti sifatida o‘rgatilmagan.

O‘sha kuni kechqurun uni Engelvud kasalxonasiga yetkazishgan. U yerda bir necha hafta davolangan. Bir necha kundan so‘ng Sedi uni ko‘rgani kelgan.

“U yugurib kelib ustimga sakrab, yuzlarimdan yalay boshladi, ko‘zoynagim va niqobim tushib ketdi. Men bu itni yaxshi ko‘rishimni tushundim”, — deydi Mayers.

Avvalroq mashhur qo‘shiqchi Ledi Gaganing ikkita buldogi noma’lum shaxslar tomonidan o‘g‘irlab ketilgani, keyinchalik esa noma’lum ayol tomonidan qaytarib berilgani haqida xabar berilgan edi.