Bir necha yillar davomida olimlar Marsda hayot bor yoki yo‘qligini aniqlashga harakat qilmoqda. 2021-yil 19-fevralga o‘tar kechasi insoniyat aynan shu maqsadga bir qadam yaqinlashdi: NASA’ning Perseverance marsoxodi Qizil sayyora yuzasiga muvaffaqiyatli qo‘ndi. Marsga sayohat qilish hali ham orzu bo‘lib qolmoqda, ammo sayyoraning ajoyib tasvirlari Yerda ham shunga o‘xshash landshaftlar borligini yodga soladi. Ba’zan o‘zga sayyorada bo‘lib qolish uchun boshqa qit’aga chipta sotib olishning o‘zi kifoya qiladi.
Vadi-Ram, Iordaniya
Vodi-Ram (Oy vodiysi deb ham ataladi) cho‘lini “Yerdagi Mars” deyish uchun hamma narsa bor. Qizil qumtoshlardan tortib tarixiy kraterlargacha mavjud bo‘lgan bu ajoyib joyda o‘zingizni Qizil sayyoraga kelib qolganday his qilasiz, eng muhimi esa sizga hech qanday harorat o‘zgarishi yoki kosmik nurlanish zarar yetkazmaydi.
San Pedro de Atakama, Chili
Agar siz uchun Marsning noodatiy manzarasi eng muhim xususiyat bo‘lsa, unda Chilining San Pedro de Atakama qishlog‘ini sayohatlar ro‘yxatiga qo‘shib qo‘ying. Tuzli tekisliklar, vulqonlar, geyzerlar va issiq buloqlar — mahalliy landshaft Qizil sayyora manzarasi bilan bemalol raqobatlasha oladi.
Moab, AQSh
Marsga o‘xshash joylar ro‘yxati Amerika Moabisiz to‘liq bo‘lmaydi. Yuta shtatining sharqida joylashgan shahar, Arches milliy bog‘idagi qizil tosh shakllarini va Kanyonlendlarni o‘rganish uchun ideal maskandir. Bu yerdan topilgan dinozavrlar izlari hududni yanada sirli ko‘rsatadi.
Karijini, Avstraliya
Marsga sayohat qilishni orzu qilsangiz, o‘z sayyoramiz haqida ko‘proq ma’lumot bilishingiz lozim. Bu borada ikki milliard yillik Karijini milliy bog‘i sizga ma’qul keladi. Qadimgi daralar va dunyodagi eng qadimgi qizil toshlar orasida o‘zingizni makon va zamon oralig‘iga tushib qolgandek his etasiz.
Mivatn ko‘li, Islandiya
Muzlar va olov mamlakati — Islandiya o‘zining g‘ayrioddiy tabiati bilan mashhur. Ushbu ajoyib orolning shimolida joylashgan Mivatn ko‘li va uning atrofi qachonlardir qotib qolgan lava oqimi bilan qoplangani sababli Marsdagi landshaftlarni eslatadi.
Sesriyem, Namibiya
Hayot alomatlari deyarli yo‘q cho‘lda joylashgan kichik aholi punkti Marsga juda o‘xshaydi. Bu yer Qizil sayyoradagi hayotga moslashish uchun eng zo‘r joy! Ushbu ajoyib hududni tomosha qilishning eng yaxshi usuli — sayyohlik marshrutidan foydalangan holda havo sharlarida sayr qilishdir.
Izoh (0)