Futbol bo‘yicha Yevropa Chempionlar Ligasining 1/8 final bosqichi dastlabki uchrashuvlari doirasida navbatdagi ikki o‘yin 23-fevral, seshanba kuni bo‘lib o‘tdi.
Myunxenning “Bavariya” klubi “Latsio” maydoniga safar qildi. Bellashuvda nemislar italiyaliklarga imkoniyat qoldirmadi. Uchrashuvning 9-daqiqasida Robert Levandovski “Bavariya”ni hisobda oldinga olib chiqdi. 24-daqiqada 17 yoshli Jamal Musiala hisobni oshirgan bo‘lsa, 42-daqiqada Leroy Sane myunxenliklarning 3-golini kiritdi.
Ikkinchi bo‘limning boshida Franchesko Acherbi o‘z darvozasini ishg‘ol qilib, hisobni yana ham yirik ko‘rinishga keltirdi. Ushbu goldan ikki daqiqa o‘tib Xoakin Korrea “Latsio”ning o‘yindagi yagona goliga muallif bo‘ldi.
Madridda “Atletiko” Londonning “Chelsi” klubini qabul qildi. Bellashuv teng kurashlar ostida kechdi. Uchrashuvning 68-daqiqasida Olivye Jiru qaychi uslubida zarba berib hisobni ochdi. Mazkur gol o‘yin so‘ngiga qadar yagonaligini saqlab qoldi. Natijada Tomas Tuxel shogirdlari safardan g‘alaba bilan qaytadigan bo‘ldi.
Mazkur juftliklar o‘rtasidagi javob uchrashuvlari 17-mart kuni bo‘lib o‘tishi rejalashtirilgan.
Chempionlar Ligasi
1/8 final, dastlabki uchrashuvlar
23-fevral, seshanba
“Latsio” Italiya — “Bavariya” Germaniya 1:4
Gollar: 0:1 – 9 Levandovski, 0:2 – 24 Musiala, 0:3 – 42 Sane, 0:4 – 47, avtogol Acherbi, 1:4 – 49 Korrea.
“Latsio”: Reyna, Acherbi, Musakko (Lulich, 31), Gabarron (Hudt, 53), Latssari, Leyva (Eskalante, 53), Marushich, Luis Alberto (Akpa-Akpro, 81), Milinkovich-Savich (Kataldi, 81), Korrea, Immobile.
“Bavariya”: Noyer, Zyule, Alaba, Boateng, Devis, Kimmix, Musiala (Shupo-Moting, 90), Sane (Sarr, 90), Goretska (Xavi Martines, 63), Koman (Lyuka Ernandes, 75), Levandovski.
Ogohlantirishlar: Luis Alberto (28), Leyva (51), Korrea (57), Marushich (65), Eskalante (69), Kimmix (72), Koman (75).
“Atletiko M” Ispaniya — “Chelsi” Angliya 0:1
Gol: 0:1 – 68 Jiru.
“Atletiko”: Oblak, Felipe, Savich, Ermoso (Vitolo, 84), Koke, Lemar, Saul (Torreyra, 82), Korrea (Dembele, 82), Lorente, Joau Feliks (Lodi, 82), Suares.
“Chelsi”: Mendi, Ryudiger, Aspilikueta, Kristensen, Alonso, Kovachich (Ziyosh, 74), Jorjinyo, Maunt (Kante, 74), Hadson-Odoi (Jeyms, 80), Verner (Pulishich, 87), Jiru (Haverts, 87).
Ogohlantirishlar: Maunt (1), Lyorente (63), Jorjinyo (64), Lemar (90).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)