Chexiyaliklar uchun 25-fevraldan boshlab odam gavjum joylarda respirator, nanoniqob yoki birdaniga ikkita tibbiy niqob taqish majburiyati joriy etildi. Bu haqda “RIA Novosti” xabar berdi.
Chexiya sog‘liqni saqlash vaziri Yan Blatniniga ko‘ra, bu tartib koronavirusning “britancha” shtammi keng tarqalishi bilan bog‘liq. Yangi talab, xususan, do‘konlar, kasalxonalar, jamoat transporti va bekatlarga nisbatan qo‘llaniladi.
“25-fevraldan boshlab belgilangan joylarda fuqarolar yuziga FFP2 turdagi respirator, nanoniqob yoki bir vaqtning o‘zida ikkita tibbiy niqob taqishi kerak bo‘ladi”, — dedi Blatni.
Uning so‘zlariga ko‘ra, Vazirlar mahkamasi ijtimoiy himoyaga muhtoj qatlam uchun kompensatsiya ajratish masalasini hali ko‘rib chiqmadi. Iqtisodchilarning hisobiga ko‘ra, bir oyda to‘rt kishidan iborat oilaga bir martalik respiratorlar uchun 2000 krona (taxminan 988 500 so‘m) kerak bo‘ladi.
Hukumat respirator taqish majburiyatini joriy etmoqchiligi haqidagi yangiliklardan keyin, so‘nggi kunlarda bu mahsulotlar har kuni dorixonalarda ham, do‘konlarda ham sotilib ketyapti. Eng arzon respiratorlar internet do‘konlarda deyarli to‘liq sotib tugatildi.
Ko‘pchilik pulni iqtisod qilish maqsadida bitta respiratorni uzoq muddat ishlatadi, bu esa himoya vositasini virus tashuvchi qo‘shimcha manbaga aylantiradi, deb xavotir bildirdi tibbiyot xodimlari.
Chexiyada favqulodda holat e’lon qilinib, soat 21:00 dan 05:00 gacha komendantlik soati joriy etildi. G‘arbdan Xeb va Sokolov, sharqdan Trutnov shaharlari kirish va chiqish uchun yopildi. U yerda koronavirus bilan kasallanganlar soni mamlakat bo‘yicha o‘rtacha ko‘rsatkichdan uch-to‘rt barobar ko‘p.
Avvalroq Germaniyada ham karantin muddati uzaytirilgani, aholiga tibbiy va respiratorli niqoblarni taqish majburiy qilingani haqida xabar berilgan edi.
Izoh (0)