Rossiyada COVID-19’ning “britancha” shtammini aniqlaydigan test ro‘yxatdan o‘tkazildi

“Roszdravnadzor” (Rossiya sog‘liqni saqlash sohasidagi nazorat bo‘yicha federal xizmati) koronavirusning “britancha” shtammida uchraydigan ikkita mutatsiyani aniqlash uchun Rossiyadagi birinchi test tizimini ro‘yxatdan o‘tkazdi. Bu haqda muassasa rahbari Alla Samoylova ma’lum qildi, deb yozadi “RBK”.

“‘Roszdravnadzor’ tomonidan SARS-CoV-2 koronavirusining ‘britancha’ shtammiga xos bo‘lgan ikkita mutatsiyani polimeraz zanjirli reaksiya usulida aniqlash uchun Rossiyadagi birinchi test tizimi ro‘yxatga olindi”, — dedi Samoylova.

SARS-CoV-2 virusining “britancha” mutatsiyalarini aniqlash uchun yangi test tizimi Rossiya Sog‘liqni saqlash vazirligining Kulakov nomidagi Akusherlik, ginekologiya va perinatologiya milliy tadqiqot markazi tomonidan “DNK-texnologiyalar” kompaniyasi bilan hamkorlikda yaratilgan.

Fevral o‘rtalarida “Rospotrebnadzor” (Rossiya Iste’molchilar huquqlari va inson farovonligi sohasidagi nazorat bo‘yicha federal xizmat) olimlari koronavirusning “britancha” shtammini aniqlaydigan dunyodagi birinchi test tizimini ishlab chiqqani va ro‘yxatdan o‘tkazganini ma’lum qilgan edi. “Yangi test tizimi aynan mutatsiyaga uchragan shtammning bor-yo‘qligini tezkor aniqlaydi, bunga ‘britancha’ mutatsiyani samarali amplifikatsiya qilish uchun oligonukleotidlarni alohida saylab olish orqali erishilgan va virusning 106 nusxa/ml darajasidagi maksimal zichligiga moslashtirilgan. Bu virus yuklamasi juda katta bo‘lgan namunalar uchun mutatsiyani aniqlashda soxta musbat natijalar kelib chiqishidan saqlaydi”, — deya “Rospotrebnadzor” aniqlik kiritgan edi.

Dekabr oyi o‘rtalarida Buyuk Britaniyada koronavirusning yangi mutatsiyasi aniqlangandi. Ko‘pgina mamlakatlar, shu jumladan, Rossiya Buyuk Britaniyaga parvozlarni vaqtincha to‘xtatdi. Rossiyalik virusolog yangi variantning tez tarqalayotgani sababli u asta-sekin eski shtamm o‘rnini bosishini aytgan. Yanvar oxirlariga kelib, koronavirusning yangi shtammi 60 ga yaqin mamlakatda qayd etilgan edi.