Dortmundning “Borussiya” klubi Chempionlar Ligasi 1/8 final dastlabki uchrashuvi doirasida 17-fevral, chorshanba kungi “Sevilya”ga qarshi bahsda (3:2) g‘alabaga erishdi.
Nemis klubining o‘yindagi ikki goliga hujumchi Erling Holand mualliflik qildi. Norvegiyalik futbolchi Chempionlar Ligasi doirasidagi 13 o‘yinda 18 ta gol urishga muvaffaq bo‘ldi. Bu rekord natija hisoblanadi. Hali hech qaysi futbolchi 18 ta gol urish uchun bu qadar kam o‘yin sarf qilmagandi.
Shuningdek, Holand Chempionlar Ligasidagi norvegiyalik to‘purarlar ro‘yxatida ikkinchi o‘ringa ko‘tarildi. U “Valensiya” sobiq forvardi Jon Karyuga (18) yetib oldi, “Manchester Yunayted” sobiq hujumchisi Ole-Gunnar Sulsherdan (19) esa bitta gol ortda qolmoqda.
Holand 2020/21-yilgi mavsum “Borussiya D” safida 25 ta o‘yin o‘tkazib, 24 ta gol urishga muvaffaq bo‘ldi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)