Rossiya O‘zbekiston fuqarolarining mamlakatga kirib kelishi, jumladan, o‘qish maqsadida kelishlari uchun o‘rnatilgan cheklovlarni bekor qilgani yo‘q. Bu haqda O‘zbekiston Tashqi ishlar vazirligi matbuot xizmati ma’lum qildi.
16-fevral kuni “Rospotrebnadzor” aviaqatnov tiklangan mamlakatlardan kelayotgan xorijlik talabalar uchun ayrim talablar evaziga o‘qishiga ruxsat bergan. Bunda talaba koronavirusga PZR usuli bilan ikki marta – Rossiya hududiga kirib kelishdan ko‘pi bilan uch kun oldin hamda Rossiya hududiga kirib kelgandan so‘ng 72 soat mobaynida test topshirishi lozim.
O‘zbekiston TIVning ma’lum qilishicha, 16-fevral holatiga Rossiya O‘zbekiston fuqarolarining kirib kelishlari, jumladan, o‘qish maqsadida kelishlari uchun o‘rnatilgan cheklovlarni bekor qilgani yo‘q.
Shu munosabat bilan, elchixona Rossiya oliy o‘quv yurtlarida ta’lim oladigan O‘zbekiston fuqarolari ushbu mamlakatga kirish huquqi bo‘lgan fuqarolar toifasiga kirmasligini yana bir marotaba eslatdi.
Eslatib o‘tamiz, Rossiya ta’lim va ilm-fan vazirining buyrug‘i bilan 8-fevraldan boshlab ushbu vazirlik huzuridagi oliy o‘quv yurtlarida kunduzgi o‘qish jarayoni boshlandi. 2020-yilning 13-noyabridan buyon talabalar masofaviy tarzda o‘qiyotgandi.
Rossiyada o‘qishning boshlanishi o‘zbekistonlik talabalarning ushbu mamlakat hududiga kirishi uchun asos bo‘la olmasligi haqida TIV avval ham ogohlantirgandi.
Izoh (0)