2020-yilda huquqiy ekspertiza uchun Adliya vazirligiga kelib tushgan 2 ming 300 ta hujjatdan 33 foizi qaytarib yuborilgan. Idoraviy hujjatlar bo‘yicha esa 50 foizgacha hujjatlar ro‘yxatdan o‘tkazilmagan. Bu haqda 15-fevral kuni adliya vaziri ishtirokida o‘tkazilgan matbuot anjumanida so‘z yuritildi, deya xabar bermoqda “Daryo” muxbiri.
Tadbirda adliya vaziri Ruslanbek Davletov qonunchilik hujjatlarining 33 foizi qaysi omillar tufayli ekspertizadan o‘tkazilmaganiga munosabat bildirdi.
“Hujjatlarni huquqiy ekspertizadan qaytayotganining birinchi sababi, amaldagi boshqa qonun hujjatlariga mos emasligi. Ya’ni juda ko‘plab qonun hujjatlari qabul qilingani ortidan, oldingi normalarga e’tibor qilmasdan shunga zid normalar kiritib qo‘yiladi.
Ikkinchisi, bu tor doiradagi idoraviy manfaatlar. Buni qilishimiz kerak, bizga mana bunaqa huquq kerak, ruxsatnoma, litsenziya kiritishimiz kerak, degan turli xohish va talablar aytiladi. Uchinchisi, qonunchilik texnikasi bor (amal qilinmaydi yoki zid).
To‘rtinchisi, u yerda korrupsiogen omillarning bo‘lishi. Agar ular qabul qilinadigan bo‘lsa, tadbirkorlar va fuqarolarga og‘irlik olib kelishi mumkin. Biz uni ijro nuqtayi nazaridan ko‘rib chiqamiz. Shu kabi asosiy muammolar mavjud”, — dedi vazir.
Ruslanbek Davletov bu boradagi umumiy muammolarga ham to‘xtalib o‘tdi.
“Masalan, topshiriq bo‘ladi: qaysidir sohada tubdan takomillashtirish bo‘yicha qaror loyihasi qilinsin, deyiladi. Keyin siz qarorni o‘qisangiz, uning ichida tubdan takomillashtirish to‘g‘risida hech narsa bo‘lmaydi. Asosiy vazifalari etib bular belgilansin… Keyin mana bunga e’tibor qaratilsin, deyilgan bo‘ladi. Umuman yangilik bo‘lmaydi. Shu sababli bu hujjatlar qaytib ketadi, g‘oya bo‘lmaganidan keyin biz o‘tkaza olmaymiz. Bunday hujjat qabul qilingani bilan tizimda hech narsa o‘zgarmaydi-ku?
Bunday muammolarning yechimlaridan biri shuki, yaxshi mutaxassislar davlat idoralariga kelib ishlashi kerak, buning uchun davlat idoralarining jozibadorligi oshishi zarur”, — dedi u.
Izoh (0)