Prezident Shavkat Mirziyoyev 11-fevral kuni “Davlat aktivlarini xususiylashtirish jarayonlarini yanada jadallashtirish to‘g‘risida”gi farmonni imzoladi. Hujjat bilan 2021-yilning aprel oyida davlat ulushi sotuvga qo‘yiladigan 18 ta korxona ro‘yxati tasdiqlangan, deb xabar beradi “Gazeta.uz”.
Kompaniyalarning deyarli barchasi aksiyadorlik jamiyati hisoblanadi:
- “Kvars” — 89,5 foiz;
- “Trest-12” — 51 foiz;
- “O‘zbekkimyomash” — 44,7 foiz;
- “Jizzax Plastmassa” — 85,8 foiz;
- Qo‘qon mexanika zavodi — 64,1 foiz;
- Farg‘ona neftni qayta ishlash zavodi — 100 foiz;
- “Kafolat” — 49,3 foiz;
- “Toshkentvino” — 51,8 foiz;
- “O‘zbekiston shampani” — 51 foiz;
- Xovrenko nomidagi Samarqand vino kombinati — 71,2 foiz;
- “Qibray sharob ilmiy-eksperimental korxonasi” — 100 foiz;
- “Urganch sharob” — 60,3 foiz;
- Nukus vino zavodi — 51 foiz;
- “Shahrisabz vino-aroq” — 51 foiz;
- “Sirdaryo vino” — 51 foiz;
- “Konvin” — 51 foiz;
- “Mastona” — 51 foiz;
- “Elektr qishloq qurilish” — 53,4 foiz.
10-fevral kuni Prezident bosh vazir o‘rinbosari Jamshid Qo‘chqorov va Davlat aktivlarini boshqarish agentligi direktori Akmalxon Ortiqovga davlat ulushi mavjud korxonalarni xususiylashtirish jarayonini tezlashtirish bo‘yicha topshiriq bergandi.
Farg‘ona neftni qayta ishlash zavodini xususiylashtirish yo‘lida yana bir urinish
O‘zbekiston Prezidentining 2019-yil 10-apreldagi qaroriga ko‘ra (hozirga amalda), Indoneziyaning RT Trans Asia Resources kompaniyasi “O‘zneftmahsulot”ning Farg‘ona neftni qayta ishlash zavodida 100 foiz davlat ulushini 16 million dollar miqdorida boshlang‘ich to‘lovini amalga oshirishi orqali olishi kerak edi. Vazirlar Mahkamasining 25-apreldagi qarori bilan (u ham hamon kuchda) davlat ulushini amalga oshirish shartlari e’lon qilingan, jumladan, Farg‘ona neftni qayta ishlash zavodi aylanma mablag‘lari uchun kamida 120 million dollar jalb etish belgilangan. Bundan tashqari, o‘zbekistonlik A’zam va Omon Aslanovlar zavodni modernizatsiyasi va kelajakda rivojlantirishga oid rejalari bilan bo‘lishgandi.
Biroq Davlat aktivlarini boshqarish agentligi ma’lumotlariga ko‘ra, Farg‘ona neftni qayta ishlash zavodini Jizzakh Petroleum QK MChJ ishonchli boshqaruviga berish bo‘yicha qaror qabul qilingan. Jizzakh Petroleum qo‘shma korxonasi “O‘zbekneftgaz” va Gas Project Development Central Asia tomonidan 2017-yil iyunda yaratilgan. Loyiha ko‘ra, ustav kapitalidagi ishtirokchilar ulushini “O‘zbekneftgaz” ulushining 60 foizdan 30 foizgacha pasayishi va xorijiy muassislar ulushini 40 foizdan 70 foizgacha o‘sishi bilan qayta taqsimlandi.
Iyun oyida muassislar tarkibi quyidagicha: Kiprdan Belvor Holding Limited (68 foiz), “O‘zbekneftgaz” (30 foiz) va Gas Project Development Central Asia (2 foiz), hozirda “O‘zbekneftgaz” va Belvor Holding Limited o‘rtasidagi ulush 49 foiz bo‘lib taqsimlangan.
Avvalroq Farg‘ona neftni qayta ishlash zavodi dizel yoqilg‘isi narxlarini pasaytirgani ma’lum qilingandi. Shuningdek, Farg‘onada 2023-yildan boshlab Ai-92 benzin va “Yevro-5” standartidagi dizel ishlab chiqarilishi haqida xabar berilgandi.
Izoh (0)