Xalq ta’limi vaziri Sherzod Shermatov o‘zining Telegram’dagi kanaliga O‘zbekistonda ishlayotgan amerikalik pedagoglarning xarajatlari AQSh tomonidan, rossiyaliklarniki esa Rossiya tomonidan qoplanishini ma’lum qildi.
Vazirning qayd etishicha, ular mahalliy o‘qituvchilar bilan parallel ravishda dars o‘tadi, soatini olib qo‘ymaydi. Xitoydan kelayotgan 1300 ta kompyuter xarajatlari ham davlat budjetidan emas, balki Xitoy tomonidan qoplanmoqda.
“Avvalgi yangiliklarga bu chet ellik o‘qituvchilarga shuncha pulni berib, bizning o‘qituvchilar nonini yarimta qilyapti, degan ma’nodagi izohlarni o‘qib, shu masalaga oydinlik kiritib qo‘yish kerak ekan, deb o‘yladim. Prezidentimiz tomonidan dunyodagi eng salohiyatli davlatlar bilan o‘zaro hamkorlik aloqalari o‘rnatilishi ortidan ushbu davlatlar tomonidan O‘zbekistondagi ta’lim islohotlariga ko‘maklashish uchun katta grant mablag‘lari ajratilmoqda”, — deb yozadi vazir.
Sherzod Shermatovning qo‘shimcha qilishicha, grant mablag‘lari O‘zbekistonga pul ko‘rinishida emas, balki o‘sha davlat tomonidan moddiy (masalan, Xitoydan kompyuterlar) yoki nomoddiy (AQShdan va Rossiyadan o‘qituvchilar xizmati) yordam ko‘rinishida beriladi. Bundan tashqari, yana ko‘plab mamlakatlar va xalqaro tashkilotlar ham yordam bermoqda.
Eslatib o‘tamiz, “San’at, fan va sport” xayriya jamg‘armasi O‘zbekistonda rus tili va umumiy fanlarni rus tilida o‘qitish sifatini oshirishga qaratilgan dasturga yordam berishi ma’lum qilingandi. 9-fevral kuni O‘zbekiston maktablari va oliy o‘quv yurtlarida dars berish maqsadida 27 nafar amerikalik ingliz tili o‘qituvchi va olimlari tashrif buyurgan.
Izoh (0)