“Milan” hujumchisi Zlatan Ibragimovich A Seriya 21-turi doirasida “Krotone”ga qarshi bahsda (4:0) dubl qayd etdi.
39 yoshli hujumchi klub futbolidagi o‘zining 500 va 501-gollarini urdi.
Zlatan “Milan”dagi faoliyati davomida 83 marta to‘p kiritdi. Shuningdek, shvetsiyalik futbolchi “Malmyo” (18 gol), “Ayaks” (48), “Yuventus” (26), “Inter” (66), “Barselona” (22), PSJ (156), “Manchester Yunayted” (29) va “Los-Anjeles Gelaksi” (53) kabi klublar safida ham gollar urishga muvaffaq bo‘lgan.
Ibragimovich A Seriya 2020/21-yilgi mavsumidagi 11 o‘yinda 14 ta gol urgan holda to‘purarlar jadvalida ikkinchi o‘rinda bormoqda. Birinchi o‘rinni 16 ta gol bilan Krishtianu Ronaldu egallab turibdi, biroq “Yuventus” forvardi bu natijaga 17 ta o‘yinda erishgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)