“Ayaks” darvozaboni Andre Onana 1 yilga diskvalifikatsiya qilindi. U rafiqasining futbolchilar uchun taqiqlangan dorisini ichib qo‘ygan

UEFA “Ayaks” darvozaboni Andre Onanani antidoping qoidalarini buzgani uchun 12 oyga diskvalifikatsiya qildi.

Ma’lum bo‘lishicha, 2020-yilning 30-oktabrida musobaqadan tashqari tekshiruv o‘tkazilganda 24 yoshli futbolchining peshobidan furosemid (buyrak yetishmovchiligida qo‘llaniladi) dori vositasi aniqlangan. Diskvalifikatsiya 2021-yilning 5-fevralidan barcha musobaqalar doirasida kuchga kirgan.

“Ayaks” klubi kamerunlik darvozabonning 30-oktabrda o‘zini yomon his qilgani va rafiqasiga buyurilgan dori-darmonlarni qabul qilganini ma’lum qilgan.

Komissiya qaroriga ko‘ra Onananing harakatlarida g‘arazli niyat bo‘lmagan, ammo sportchi baribir o‘z tanasiga taqiqlangan moddalarning tushmasligini nazorat qilishi kerak bo‘lgan.

Onana va “Ayaks” ushbu masala yuzasidan Sport arbitraj sudiga (CAS) murojaat qilmoqchi.

Andrea Onana Niderlandiya chempionatining 2020/21-yilgi mavsumida 20 ta o‘yin o‘tkazib, 9 ta bahsda o‘z darvozasi daxlsizligini saqlab qolgan.