O‘tgan bir hafta ichida butun dunyo bo‘ylab koronavirusga chalinish holati kamaydi, biroq o‘lim darajasi maksimal ko‘rsatkichga erishdi — birinchi bor yetti kun ichida COVID-19 qurbonlari soni 100 ming kishidan oshdi, deb xabar beradi “Korrespondent.net”.
2020-yilning oktabr o‘rtalaridan buyon birinchi bor dunyo bo‘ylab bir hafta ichida koronavirusga chalinganlar soni 4 milliondan kamroqni tashkil etdi. Kasallik tasdiqlanganlar soni 3,98 million kishiga yetgan — bu bir hafta oldingi ko‘rsatkichdan 10 foizga kam degani.
Joriy haftada dunyo bo‘ylab koronavirusga chalingalar soni 100 million kishidan oshdi. Shunday qilib, sayyoradagi har 75 kishidan biri koronavirusga chalingan.
Hozirga qadar bemorlarning 73 millioni sog‘aygan, yana 26 millionga yaqin odam davolanmoqda, biroq ushbu ma’lumotlar to‘liq emas — ayrim mamlakatlar tegishli statistikani e’lon qilmay qo‘ygan.
Kasallanish holatlari eng yuqori bo‘lgan davlatlarda kasallikka chalinish holatlari kamaymoqda. AQShda ushbu ko‘rsatkich yil boshidan buyon ikki barobarga kamaygan: yanvar boshida mamlakatda 300 mingdan ortiq odamda koronavirus aniqlangan bo‘lsa, hozirda 160 mingdan oshmoqda. Hindistonda sutkasiga 10—12 ming kishida COVID-19 tasdiqlanmoqda — bu noyabr oxiriga qaraganda to‘rt barobar kam. Braziliyada esa kuniga 50 mingdan ortiq odam koronavirusga chalinyapti.
Yevropada kasallikning navbatdagi to‘lqinini Italiyada to‘xtatishga muvaffaq bo‘lingan, u yerda sutkalik kasallanish holatlari yil boshiga qaraganda 1,6 barobarga kam, shuningdek, mazkur davrda infeksiya tarqalgan Buyuk Britaniya va Chexiyada ham ikki barobar kamaygan.
Koronavirusga chalinish holatlarining kamayib borayotgani fonida o‘lim holatlari o‘smoqda: so‘nggi yetti kun ichida dunyoda 102,1 ming bemor vafot etgan. Bu undan oldingi hafta bilan solishtirganda 8 ming kishiga ko‘p demak. O‘lim darajasi 2,14 foizdan 2,16 foizga oshgan.
O‘lim holatlarining chorak qismi AQSh hisobiga to‘g‘ri kelmoqda — mamlakatda har kuni 3,5 mingga yaqin odam vafot etyapti. Bir hafta ichida AQShda 15 foizga ko‘proq o‘lim holati qayd etilgan. Biroq AQShda o‘lim darajasi dunyo bo‘yicha o‘rtacha ko‘rsatkichdan kam — 1,7 foiz.
Meksikada esa o‘tgan haftadagi ko‘rsatkich taxminan 25 foizga oshib ketgan. Vafot etganlar soni 9,2 mingga oshgan (jami 155 ming) — bu jami kasallarning 8,5 foiziga teng. Meksika o‘lim darajasi bo‘yicha faqat Yamandan orqada ketmoqda, u yerda koronavirusga chalingalarning qariyb 30 foizi vafot etgan.
Buyuk Britaniyada esa ketma-ket ikkinchi hatfa 8,5 ming kishi COVID-19 qurboniga aylanmoqda. Braziliyada kuniga mingga yaqin inson koronavirusdan vafot etmoqda — bu pandemiya boshlanganidan buyon maksimum hisoblanadi.
Izoh (0)