Dengiz qaroqchilari Nigeriya qirg‘oqlari yaqinidagi Gvineya ko‘rfazida Turkiyaning yuk kemasiga hujum qilib, ekipajning 15 a’zosini asirga oldi. Bu haqda Turkiya dengiz floti boshqarmasiga tayanib NTV xabar qildi.
Ma’lumotlarga ko‘ra, Mozart yuk kemasi Liberiya bayrog‘i ostida San-Tome shahridan 181 kilometr uzoqlikda joylashgan Lagosdan Keyptaunga suzib ketayotgan bo‘lgan. Kemaga hujum qilgan qaroqchilar 15 nafar dengizchini garovga olgan, bir kishini o‘ldirgan.
Qaroqchilar asirlar bilan kemani tark etgan. Qolgan uch dengizchi kemani xavfsiz portga olib ketgan. O‘ldirilgan dengizchi Ozarbayjon fuqarosi, qolganlari turkiyalik ekani ma’lum qilingan.
Ta’kidlanishicha, Turkiya prezidenti Rajab Erdo‘g‘on kema komandiri bilan ikki marta aloqaga chiqqan. U ushbu jarayonni diqqat bilan kuzatayotganini aytib, kemaning o‘g‘irlangan ekipajini qutqarish bo‘yicha choralar ko‘rishni buyurgan.
Qayd etilishicha, qaroqchilar kemaning aksariyat tizimlarini o‘chirib qo‘ygan, ekipajning qolgan a'zolari portga yo‘l topishi uchun faqat navigatsiya tizimini yoniq qoldirgan. Hozirda kema Jentil Gabon portiga yo‘l olmoqda.
Xalqaro dengiz byurosi ma’lumotlariga ko‘ra, Nigeriya, Gvineya, Togo, Benin va Kamerun qirg‘oqlari yaqinidagi Gvineya ko‘rfazi qaroqchilik tufayli dunyodagi eng xavfli dengiz hududi hisoblanadi.
Izoh (0)