Prezident Shavkat Mirziyoyev ayni paytda xalq deputatlari Buxoro viloyat sessiyasining navbatdan tashqari 25-sessiyasida ishtirok etmoqda.

Foto: Prezident matbuot xizmati

“Daryo” muxbiri Musulmonbek Ibrohimovning xabar berishicha, Prezident koronavirus pandemiyasi to‘g‘risida gapirarkan, Buxoro viloyatining sobiq hokimlari — marhum O‘ktam Barnoyev va Karim Kamolovni ham yodga oldi.

“Koronavirus tufayli ko‘p yillar davomida yonimda ishlagan O‘ktam Barnoyev va Karim Kamolov ham dunyodan ko‘z yumdi. Biz ularni hech qachon unutmaymiz. Bu balo sabab o‘tganlarimizni, ayniqsa, O‘ktam Barnoyev va Karim Kamolovning yaqinlari, oila a’zolariga chuqur ta’ziya bildiraman.

Ushbu kasallik tibbiyotimizning quyi pog‘onasidagi, ayniqsa, aholi salomatligi masalasida katta-katta muammolar borligini ko‘rsatib berdi. Sog‘lig‘imizning 90 foizi o‘zimizga — yurish-turishimiz, ovqatlanishimizga bog‘liq.

Yevropada chiqqan shtamm bizgacha yetib kelmasligiga hech kim kafolat berolmaydi. Bunday kasallikning oldida ojiz qoldik. Shu bois avvalo, oilamiz, yaqinlarimiz, ayniqsa, keksalarimizni sog‘lig‘iga alohida e’tibor qaratishimiz lozim”, — dedi davlat rahbari.