Mashhurlar ko‘pincha film yoki seriallarda superqahramon rolini o‘ynashiga to‘g‘ri keladi. Ammo ularning orasida hayotda ham qahramonlarcha yordam berishga shay bo‘lganlar yo‘q emas.
Leonardo Di Kaprio
Aktyor 2020-yilning 30-dekabr kuni dugonasi Kamila Morrone va do‘stlari bilan Karib orollaridagi yaxtada dam olayotgan vaqt kemadan yiqilib tushgan yo‘lovchi qidirlayotgani haqidagi favqulodda chaqiruvni eshitgan va uni qidirib yo‘lga tushgan. Di Kaprioning yaxtasi o‘sha hududdagi yagona kema bo‘lgan. Yo‘qolgan yo‘lovchini quyosh botishidan bir soat oldin topishga muvaffaq bo‘lishgan.
Benedikt Kamberbetch
Rafiqasi bilan birga taksida ketayotgan Benedikt mashina oynasidan velosipedchi-kuryerga 4 nafar bosqinchi hamla qilganiga guvoh bo‘lgan. Erkakning boshiga butilka urib sindirilganiga jim qarab turolmagan aktyor mashinadan tushib uni himoya qilishga kirishgan. Zo‘ravonlar unga dag‘dag‘a qilishga kirishgan bir vaqtda taksi haydovchisi yordamga oshiqqan va qizig‘i shundaki, ushbu hodisa to‘qima qahramon Sherlok Holmsning Beyker-stritdagi uyi yonida yuz bergan. Haydovchi aktyorning qo‘rqmasligidan hayratda qolgan. Benediktning o‘zi esa buni qahramonlik deb hisoblamasligi, shunchaki burchini bajarganini bildirgan.
Tom Kruz
1996-yilda aktyor Santa-Monikada 23 yashar qizni mashina urib ketganiga guvoh bo‘lgan. Tez yordamga qo‘ng‘iroq qilgan Kruz tibbiyot xodimlari yetib kelgunicha joyidan jilmagan. Jabrlanuvchining tibbiy sug‘urtasi yo‘qligini bilganidan keyin esa o‘z cho‘ntagidan 7000 dollar to‘lagan. Bu hali hammasi emas. Oradan yillar o‘tib yana bir marta jonbozlik ko‘rsatgan. Qo‘shni ayol mashinadan tushganida zo‘ravonlar uni o‘rab olib 153 ming dollarlik taqinchoqlarini yulib, olib ketmoqchi bo‘lgan. Shu vaqt Tom qo‘riqchilari bilan birga paydo bo‘lgan va zo‘ravonlarni haydab yuborgan.
Shahzoda Garri
2012-yilda bo‘lib o‘tgan polo bo‘yicha xayriya musobaqasida Garrining raqiblaridan biri ot ustidan yiqilib, hushini yo‘qotgan. Garri bunga jim qarab turmagan va armiyada xizmat qilgan vaqti o‘rgangani singari darhol birinchi yordam ko‘rsatgan.
Jerard Batler
Shotlandiya qasrlaridan birining yonida piknik qilib o‘tirgan Jerard kimningdir yordam so‘rab baqirayotganini eshitib qolgan. Yugurib borgan Batler begona bolaning daryoda cho‘kib ketayotganini ko‘rgan va o‘zini suvga tashlab bolani qutqarib qolgan. Qilgan qahramonligi uchun Batler, Shotlandiyaning qirollik jamiyati tomonidan Dovyuraklik sertifikatini qo‘lga kiritgan.
Keyt Uinslet
2012-yilda aktrisa oilasi bilan birga Buyuk Britaniyaning eng boy fuqarolaridan biri Richard Brensonning Karib orollaridagi uyida mehmon bo‘lgan. Ammo yarim tun vaqti chaqmoq urgani sabab uyda yong‘in sodir bo‘lgan. Bu vaqtda uyda 20 kishi bo‘lgan va Keyt, Brensonning 90 yashar onasini qutqarib qolgan.
Klint Istvud
Istvud 2014-yildagi xayriya ziyofatida nafas yo‘liga pishloq bo‘lagi tiqilib qolgan Stivni Geymlix usuli orqali qutqarib qolgan. 83 yoshda bo‘lgan Istvud taxminan 100 kilo og‘irlikdagi kishini ko‘tarib, nafas yo‘liga tiqilib qolgan pishloqni chiqarib yuborishga harakat qilgan va uning hayotini saqlab qolgan.
Mavzuga doir:
Izoh (0)