“Avtoservislarda aldanaverib, mashina tuzatishni o‘rganishga qaror qildim”. Stereotiplarni o‘zgartirgan avtomexanik qiz hikoyasi (video)

Nastya Tuman 29 yoshda. Rossiyaning Volgodonsk shahrida tug‘ilgan avtomexanik bolaligida barcha kabi oddiy qizaloq edi. 4 yoshidan boshlab raqsga tushishni o‘rgangan. Musiqa maktabini bitirganidan so‘ng qo‘shiq kuylab, raqsga tushgan. Endilikda Nastyaning million nafar obunachiga ega YouTube kanali bor. Lekin u kanaliga musiqa yoki raqs namoyishlari emas, mashina ustaxonasidagi faoliyati aks etgan videokontentlar joylashtiradi. San’atkorlikdan to‘g‘ridan to‘g‘ri mashina ustasiga aylangan qahramonimiz Nastya Tuman “Wday.ru” saytiga o‘zining qiziqarli hikoyasini so‘zlab berdi.

Ko‘pchiligimiz uchun ruldagi ayollarga bo‘lgan munosabat ma’lum. Ayniqsa, 10 yil avval bu haqda gapirib ham bo‘lmasdi. Yo‘l o‘rtasida ishdan chiqqan mashina bilan yolg‘iz qolish, atrofdagilardan haqoratli so‘zlar eshitish… Xullas yordam beradigan insonning o‘zi topilmas edi. Ana shunday vaziyatlarda nima qilish kerakligini bilmaganman. Avtoservisdagi yolg‘onlar mening bu sohani o‘rganishimga turtki bo‘ldi.

10 yil avval hayotim tubdan o‘zgardi. Xayolida qo‘shiq va raqs bo‘lgan ayolning o‘rnini avtomobil sozlovchisi egalladi. Bu voqea qizlar faqat taom tayyorlash uchun yaratilmaganini isbotlashimga katta yordam berdi.

19 yoshimda ta’mirlashni o‘rganish uchun avtoulov mexanikasini puxta o‘rganishga va uning qanday ishlashini bilishga qaror qildim. Shu tariqa men kollejni tark etdim. Ustalarga shogird tushish uchun ustaxonalardan ish izlay boshladim. Ilk urinishimdayoq ustaxona xodimlari bu yerda qizlarga joy yo‘qligini ma’lum qildi. Mening shunchaki taom tayyorlashni o‘rganishim kerakligini aytib, qaytarib yuborgan odamlar ham bo'lishdi. Ko‘p urunishlardan so‘ng menga o‘rgatadigan va qiziqishlarimga hurmat bilanqaraydigan joyni topdim. Volgodonsklik Albertga katta rahmat, u boshidanoq menga ish haqi ham to‘lay boshladi.

Avtoservisga kelgan odamlar meni ko‘rib hayron qolardi. Kimdir mening u yerda ishlashimga umuman ishonmasdi ham. Sizni ilk ko‘rib turgan odamga siz ham boshqalar kabi xizmat ko‘rsatuvchi xodim ekaningizni tushuntirish qiyin. Lekin ba’zi erkaklarning ayol kishi faqat uy ishiga yaraydi, deyishi noto‘g‘ri.

Shu tariqa ikki oylik o‘rganish davomida asosiy bilimlarni oldim va endi barchasini o‘zim bajarishim mumkin edi. Keyinchalik servisning mijozlari ko‘paya boshladi. Men o‘z kasbimni juda yaxshi ko‘raman, barchasini sinchkovlik bilan bajaraman. Ta’mirlashdan so‘ng mashinani tozalab, yuvib qo‘yaman. Bu meni boshqalardan ajratib turadi.

“5 yil ichida yo‘lda haydovchilarga 30 marta yordam berdim”

Bir kuni ta’mir uchun muntazam buzilaveradigan BMW mashinasini olib kelishdi. Sovutish tizimi ishdan chiqqan, shu sababli dvigatel qizib ketaveradi. Men uni ta’mirlashim kerak edi. Mashina uchun kerak bo‘lgan ichki qurilmalarni AQShdan olib kelishga to‘g‘ri kelgan. Bu haqiatan eng qiyin va moliyaviy jihatdan qimmat jarayon edi. Natijada ta’mir uchun ketgan xarajat mashinaning o‘zidan ham qimmatga tushgan.

Shuningdek, yo‘lda tez-tez avtomobil egalariga yordam beraman. Besh yil ichida taxminan 30 ta holat. Ularning ko‘pchiligi o‘xshash holatlar: g‘ildirakni almashtirish, mashinani o‘t oldirish, yoqilg‘ining tugashi kabi. Hammamizga ma’lum, ko‘pchilik haydovchilar avtoulov mexanikasini unchalik ham yaxshi tushunmaydi.

2015-yilda video montaj bilan shug‘ullanadigan turmush o‘rtog‘im “Avtoservisda qanday ishlashingni suratga tushir, ta’mirlashingni ko‘rsat. Ularni o‘zim montaj qilib YouTube’ga joylashtiraman”, − dedi. Dastlab ushbu g‘oyani unchalik ham jiddiy qabul qilmadim. Chunki ham ishlash, ham suratga olish qiyin edi. Ammo turmush o‘rtog‘imning bunga qiziqayotganini ko‘rib, uni xafa qilmaslikka qaror qildim. Oradan bir yil o‘tib blogerga aylandim.

Kunduzlari ta’mirlagan ishlarimni suratga olardim. Kechqurun esa ularni YouTube’ga joylashtirardim. Videolarni tomosha qilsam, barchasi bir-biriga o‘xshash. Ular haqida o‘ylab, ko‘proq yangilik qilish kerakligini angladim. Mening ayol ekanim mashinalarni ta’mirlashga xalaqit bermaydi. 2017-yildan buyon ustaxonada faoliyat yuritayotgan bo‘lsam-da, kanalni ham rivojlantirishga vaqt ajaratyapman.

“Hech bo‘lmasa, mashinaning qanday ishlashini o‘rganish kerak”

Mening birinchi mashinam otamning 1978-yilda ishlab chiqarilgan “Niva”si edi. Hozirda  Hammer H3, Nissan Skyline R33 va Toyota Chaser JZX100 avtomobillarim bor. Haydovchilikk  o‘qiyotganda, avtoulov mexanikasi mashg‘ulotlariga ham borishni kanda qilmang. Bu hayotda, albatta, kerak bo‘ladi. Agar allaqachon mashina boshqarsangiz, uning qanday ishlashi haqida o‘qing. Eng kerakligi, nimaning qayerda joylashgani, yo‘lda buzilsa, nima qilish mumkin, g‘ildirakni qanday o‘zgartirish kerak kabilar. Har bir haydovchi avtomobilning ushbu asoslarini, albatta, bilishi lozim.

View this post on Instagram