Buxoro viloyatining Shofirkon tumanida yashovchi ayol rashk sabab erini pichoqlab qo‘ydi, deya xabar bermoqda “Daryo” muxbiri.
Aytilishicha, qotillik jinoyati 2021-yilning 12-yanvar kuni tumanning “Quyi Chuqurak” mahallasida sodir bo‘lgan.
“Quyi chuqurak” mahalla fuqarolar yig‘ini raisi Jasur Nasulloyevning “Daryo”ga ma’lum qilishicha, 1965-yilda tug‘ilgan fuqaro B.Sh. hamda uning 1983-yil tug‘ilgan turmush o‘rtog‘i R.X. o‘rtasidagi rashk jinoyatga sabab bo‘lgan.
Aytilishicha, er-xotin daladan birga qaytayotgan paytda rashk sabab tortishib qolgan. Tortishuv ular uyiga kelgunga qadar ham davom etgan. Asossiz rashk ayolni asabiylashtirgan va o‘zi bilmagan holda erining chap biqiniga oshxona pichog‘ini urishiga olib kelgan.
B.Sh.ga zudlik bilan tez tibbiy yordam ko‘rsatilgan va u tuman markaziy shifoxonasiga keltirilgan.
“Ayni paytda bemor ahvolida ijobiy o‘zgarish bor. Fuqaro bilan suhbatda u ayoli bilan yashashda davom etishini, tushunmovchilik sabab ushbu holat sodir bo‘lganini bildirdi. Oila notinch oilalar ro‘yxatida turmaydi. Shu paytgacha o‘zaro ishonchsizlik sabab kelishmovchiliklar kelib chiqqan holatlar ham bo‘lmagan”, — dedi mahalla raisi.
Qayd etilishicha, er-xotin 2008-yil turmush qurgan bo‘lib, har ikkalasi ham avvalgi turmushidan ayrim sabablarga ko‘ra ajrashgan.
Jinoyat sodir bo‘lgan kuni Buxoro viloyati prokurori, viloyat IIB boshlig‘i tomonidan tuman hokimi va sektor rahbarlari, mutasaddi rahbarlar ishtirokida mahalladagi ushbu jinoyat muhokama qilingan. Jinoyatning kelib chiqish sabablari tahlil qilingan. Va jinoyatning sodir etilishiga mahallada mahallabay va xonadonbay ishlash tizimining to‘liq yo‘lga qo‘yilmagani sababligi ma’lum bo‘lgan.
Viloyat IIB axborot xizmati rahbari Shuhrat Jalolovning “Daryo”ga ma’lumot berishicha, ushbu holat yuzasidan Shofirkon tuman prokuraturasi tomonidan ayolga nisbatan Jinoyat kodeksining 25-moddasi (jinoyatga tayyorgarlik ko‘rish va jinoyat sodir etishga suiqasd qilish) 97-moddasi 1-qismi (qasddan odam o‘ldirish) bilan jinoyat ishi qo‘zg‘atilgan. Holat yuzasidan dastlabki tergov harakatlari olib borilmoqda.
Mavzuga doir:
Izoh (0)