AQSh FQB: Jo Baydenning inauguratsiyasi arafasida norozilik namoyishlari uyushtirilishi mumkin

AQSh Federal qidiruv byurosi yangi saylangan prezident Jo Baydenning 20-yanvarga belgilangan inauguratsiyasi bilan bog‘liq internetda ko‘p sonli tahdidlarni qayd etmoqda. Bu haqda idora rahbari Kristofer Rey brifingda ma’lum qildi, deb yozadi “RBK”.

“Ayni paytda biz potensial qurolli norozilik aksiyalariga da’vatlarni kuzatyapmiz”, — dedi u. Reyning so‘zlariga ko‘ra, u “potensial” so‘zini ishlatishiga sabab shuki, bu aksiyalarning qaysi biri haqiqatan ham rejalashtirilganini tushunish qiyin.

“Biz Kolumbiya okrugida, shuningdek, butun mamlakat bo‘ylab shtatlar Kapitoliy binolari yonida yaqin kunlarda o‘tkazilishi rejalashtirilgan norozilik aksiyalari va mitinglarning ko‘pchiligida zo‘ravonlik yuzaga kelishi mumkinligidan xavotirdamiz”, — deya aniqlik kiritdi FQB direktori.

Reyning aytishicha, 6-yanvar kuni Kapitoliy binosiga uyushtirilgan hujum munosabati bilan huquq-tartibot organlari xodimlari 100 dan ortiq kishini qo‘lga olgan. “Biz 200 dan ziyod odam (tartibsizliklar ishtirokchilari)ning shaxsini aniqlab bo‘ldik. Biz kimligingizni bilamiz. Agar siz u yerga borsangiz, unda FQB agentlari sizni topadi”, — deya ogohlantirdi u.

Avvalroq AQSh Federal qidiruv byurosi (FQB) Amerikaning barcha shtatlari markazlari va Vashingtonda 16—20-yanvar kunlari qurolli noroziliklar rejalashtirilayotgani haqida ogohlantirgan edi.

Tramp esa Vashingtonda favqulodda vaziyat rejimini tasdiqladi va saylangan prezident Jo Baydenning 20-yanvardagi inauguratsiyasi oldidan xavfsizlikni ta’minlash uchun qo‘shimcha federal kuchlarni yo‘naltirishni buyurdi.

Keyinroq kongress vakillari amaldagi AQSh prezidenti Donald Trampning bir necha minglab tarafdorlari 20-yanvar, chorshanba kuni saylangan davlat rahbari Jo Baydenning inauguratsiyasiga xalaqit berish uchun Kapitoliyga shiddatli hujum uyushtirishni rejalashtirayotgani haqida xabardor qilindi.

6-yanvar kuni Vashingtondagi to‘qnashuvlarda besh kishi halok bo‘ldi. Saylov yakunlaridan norozilik belgisi sifatida Kapitoliy binosiga kelishga Tramp da’vat qilgan edi, shundan keyin AQSh kongressi vakillar palatasiga impichment to‘g‘risidagi rezolyutsiya kiritildi.