Xitoyda 13-yanvar, chorshanba kuni so‘nggi 8 oy ichida birinchi bor koronavirus tashxisi qo‘yilgan bemor vafot etdi. Bu haqda Xitoy Sog‘liqni saqlash milliy komissiyasiga tayanib “RBK” xabar berdi.
Foto: Reuters
Ma’lumotlarga ko‘ra, bemor Xebey provinsiyasida, virus oqibatida yuzaga kelgan asoratlar sabab vafot etgan.
Bundan tashqari, o‘tgan bir sutka ichida yana 138 kishida koronavirus tasdiqlangan. Ularning 14 nafari xorijdan kirib kelgan. Xususan, sakkizta holat — Shanxayda, uchtasi — Guandun provinsiyasida, Pekin, Xenan provinsiyasi va Guansi-Chjuan avtonom tumanida — bittadan. Yana 124 ta holat ichki hisoblanadi: ularning 81 tasi Xebey provinsiyasida, 43 tashi — Xeylunszyan provinsiyasida.
Xitoyda pandemiya boshlanganidan buyon mamlakatga xorijdan kelgan fuqarolarning 4465 nafarida koronavirus aniqlangan. Ularning 4181 nafari sog‘aygan, hozirda 284 kishi davolanmoqda.
Avvalroq Xitoyda 5 million aholi yashaydigan shahar bir kishida koronavirus aniqlangani sabab izolyatsiyaga olingani to‘g‘risida xabar berilgandi.
