CES 2021 virtual ko‘rgazmasi doirasida Moflin nomli noodatiy o‘yinchoq namoyish etildi. U dengiz cho‘chqachasi yoki og‘maxonga o‘xshab paxmoq ko‘rinishga ega, biroq ulardan biroz farq qiladi, deb yozadi Hi-Tech.Mail.ru.

Kadr: YouTube

O‘yinchoq o‘zining “xulq-atvori” bilan egasining oldiga kelgan mushukka o‘xshaydi — uni silash va gaplashish mumkin, buning uchun qurilma ichiga maxsus datchik va mikrofon o‘rnatilgan. Bunga javoban sun’iy uy jonzoti turli ovozlar chiqaradi yoki vibratsiya beradi.

Buning uchun o‘yinchoq sun’iy intellektga ega maxsus dastur bilan jihozlangan bo‘lib, u muntazam boyib boradi. O‘yinchoq ko‘proq hissiyotlar spekterini taqdim etishga qodir — xotirjamlikdan tortib, asabiy qaltirashgacha. Shuningdek, u odamlar ovozini farqlay oladi va har bir xatti-harakati turlicha.

Shuningdek, uni muntazam quvvatlantirib borish kerak. Buning uchun uni sim yordamida ulash emas, balki maxsus savatga solish kerak — bu vaqt davomida u uxlaydi.

Bu kabi “uy hayvoni”ni sotib olish uchun 400 dollar to‘lash kerak. Oldindan buyurtmalar Kickstarter orqali qabul qilinmoqda, yetkazib berish ishlari yoz faslidan boshlanadi.