AQShning amaldagi prezidenti Donald Tramp videomurojaat bilan chiqish qilib, 6-yanvar kuni Kapitoliyda sodir bo‘lgan zo‘ravonlikni keskin qoraladi. Prezidentning bayonoti Kongressning Vakillar palatasi Trampga impichment e’lon qilganidan so‘ng Oq uyning Twitter va YouTube’dagi sahifalarida paydo bo‘lgan.
“Bir narsani aniq aytmoqchiman: o‘tgan hafta duch kelgan zo‘ravonligimizni shak-shubhasiz qoralayman. Zo‘ravonlik va vandalizmga mamlakatimiz va bizning harakatimizda mutlaqo o‘rin yo‘q. ‘Amerikani yana buyuk qilamiz’ — qonun ustuvorligini doimo himoya qilish, erkaklar va ayollarni huquqni muhofaza qilish organlarida qo‘llab-quvvatlash, eng muqaddas urf-odat hamda qadriyatlarimizni saqlashdan iborat”, — deydi Tramp.
Trampning ta’kidlashicha, uning haqiqiy tarafdorlari siyosiy zo‘ravonlik, AQSh bayrog‘i va huquq-tartibot organlariga hurmatsizlikni qo‘llab-quvvatlamaydi, shuningdek, amerikaliklarga hujum qilmaydi.
Besh daqiqali bayonotda Tramp Vakillar palatasining o‘ziga nisbatan e’lon qilgan impichmenti to‘g‘risidagi qarorini eslab o‘tmagan. Shuningdek, u Kapitoliyga uyushtirilgan hujum bo‘yicha mas’uliyatni zimmasiga olmagan.
Avvalroq Amerika Kongressining Vakillar palatasi AQSh prezidenti Donald Trampga nisbatan impichment e’lon qilish uchun ovoz berdi. Kongressmenlar Trampga nisbatan ilgari surilgan isyonga da’vat qilish ayblovini tasdiqlagan. Masala Demokratik partiyaning ko‘pchilik ovozi (222 ta) bilan qabul qilingan, bundan tashqari, Respublikachilar partiyasining 10 nafar vakili ham Trampga nisbatan impichment e’lon qilinishini ma’qullab ovoz bergan.
Izoh (0)