“Bu sir emas-ku”. SSV rahbari O‘zbekistondagi umumiy o‘lim statistikasi “rasmiy so‘rov bo‘lsa”gina berilishini ma’lum qildi

O‘zbekistondagi umumiy o‘lim holatlariga doir statistika “sir emas”, rasmiy so‘rov berilsa, ma’lumotlar taqdim etiladi. Bu haqda sog‘liqni saqlash vaziri Abduhakim Hojiboyev “Daryo” muxbiri Mirolim Isajonovga ma’lum qildi.

O‘zbekistonda 2020-yil avgustidan beri umumiy o‘lim holatlari bo‘yicha rasmiy statistik ma’lumotlar e’lon qilinmayapti. Davlat statistika qo‘mitasi oktabr oyida to‘qqiz oylik yakunlari bo‘yicha demografik holatga doir axborotnomasida umumiy o‘lim statistikasini ham e’lon qilishi lozim edi, biroq ushbu ma’lumotlar hozirga qadar e’lon qilinmagan. 2020-yil uchun faqat yanvar—iyul oylariga taalluqli o‘lim statistikasi ma’lum, xolos.

Qo‘mita ushbu holat yuzasidan noyabr oyida bergan izohida o‘lim statistikasini shakllantirish uchun mas’ul hisoblangan Adliya vazirligi va Sog‘liqni saqlash vazirligi tegishli ma’lumotlarni Statistika qo‘mitasiga taqdim etmaganini ma’lum qilgan edi. O‘shanda Adliya vazirligi qo‘mitaning bu bayonotini rad etib, ma’lumotlar taqdim etilganini bildirgan bo‘lsa, Sog‘liqni saqlash vazirligi OAVning bu boradagi so‘rovlariga javob bermagan.

“Daryo” muxbiri sog‘liqni saqlash vaziri Abduhakim Hojiboyevdan ushbu holat bo‘yicha izoh olishga urinarkan, vazir dastlab “Statistika qo‘mitasiga tegishli savolga javob berolmasligi”ni aytgan, muxbir Statistika qo‘mitasining da’vosini eslatgach (ma’lumotlar, xususan, Hojiboyev rahbarlik qilayotgan vazirlik tomonidan taqdim etilmagan), “rasmiy so‘rov berilsa, ma’lumotlar berilishi”ni ma’lum qilgan.

“Bu sir emas-ku”, — deya alohida qayd etib o‘tgan vazir Hojiboyev. Muxbir bu kabi ma’lumotlar 2020-yil oktabriga qadar rasmiy so‘rov berilmasa ham e’lon qilib kelinganini eslatganida, vazir: “Yo‘q, rasmiy so‘rov... Agar siz aytgan statistikani kimdir rasmiy so‘rasa, ma’lumot beriladi”, — deb javob bergan. Hojiboyev rasmiy so‘rovsiz bu ma’lumotlar e’lon qilinmasligini alohida ta’kidlab o‘tgan.

Ma’lumot uchun, 2020-yil iyulida O‘zbekistonda umumiy o‘lim ko‘rsatkichi shu oy uchun so‘nggi yillarda shakllangan o‘rtacha ko‘rsatkichdan 26,4 foizga, Toshkent shahrida 166 foizga, Toshkent viloyatida 43,8 foizga,Navoiy viloyatida 51,7 foizga yuqori bo‘lgan. Taxminan shu vaqtda, iyul—avgust oylarida O‘zbekistonda koronavirus pandemiyasi cho‘qqiga chiqqan, o‘lim holatlari soni keskin ko‘paygan edi.

Qayd etish joiz, Sog‘liqni saqlash vazirligi tomonidan yuritilayotgan koronavirusga doir rasmiy statistika ma’lumotlariga ko‘ra, O‘zbekistonda 2020-yil martidan to 12-yanvarga qadar jami 618 kishi koronavirus infeksiyasi oqibatlaridan vafot etgan. Biroq SSV O‘zbekistonning boshqa davlat organlari e’lon qilgan koronavirus oqibatidagi ko‘plab o‘lim holatlarini tasdiqlamagan. Shuningdek, vazirlik statistikasiga O‘zbekistonda vafot etmagan shaxs(lar) ham kiritilgan.