Xitoy raketa texnikalari tadqiqoti instituti olimlari termoelektr chip bilan jihozlangan suv solingan butilkadan quvvatlantirish qurilmasini yaratdi, deb xabar beradi “Korrespondent.net”.
Foto: Pixabay
Ta’kidlanishicha, chip suv issiqligini mobil qurilmalarni quvvatlantirishda kerak bo‘ladigan elektr energiyasiga aylantira oladi.
“300-500 ml miqdoridagi qaynoq suv bo‘lgan butilka 20-30 daqiqa elektr energiyasi bilan ta’minlay olishini aniqladik”, — deydi tadqiqot guruhi a’zosi Shen Szyan.
Namunaning namoyishida termoelektr qurilma quvvatlantirish uchun mo‘ljallangan USB-port joylashgan butilkaning qopqog‘iga o‘rnatilgan. iPhone kabel yordamida ulanganida telefon ekranida quvvat olayotgani to‘g‘risida ma’lumot paydo bo‘lgan.
Muhandislarning ma’lum qilishicha, bu kabi butilka noutbuklar, fotoapparatlar va boshqa kichik maishiy buyumlarni elektr energiyasi bilan ta’minlay oladi. Ayni vaqtda ular korxonalar bilan tijoriy ishlab chiqarish borasidagi hamkorlikni muhokama qilmoqda.
200 grammli chipga ega qurilmani ko‘tarib yurish qulay bo‘lishi uchun mutaxassislar butilka og‘irligini dastavval kosmik qurilmalar uchun yaratilgan yengil issiqlik izolyatsiyali material yordamida kamaytirgan.
Avvalroq Janubiy Koreyaning Sejon universiteti tadqiqot guruhi yangi turdagi quvvatlantirgich ustida ish olib borayotgani ma’lum bo‘lgandi. Noyob simsiz quvvatlantirgich smartfonni havo orqali quvvatlantira oladi.
