Namangan viloyatining To‘raqo‘rg‘on tumanida Turkiya kompaniyasi tomonidan kiritiladigan investitsiya evaziga avtomobil zavodi quriladi. Bu haqda viloyat hokimining investitsiyalar va tashqi savdo masalalari bo‘yicha o‘rinbosari Okibjon Inomov matbuot anjumani davomida ma’lum qildi, deya xabar beradi “Daryo” muxbiri Azizbek Abduvaliyev.
Okibjon Inomovga ko‘ra, mazkur loyiha 2021-yilda yirik ishlab chiqarish obyektlari va quvvatlarini ishga tushirish bo‘yicha respublika manzilli dasturiga kiritilgan bo‘lib, umumiy qiymati 10 million dollarga teng. Bundan 8 million dollari Turkiyaning Manas Savunma kompaniyasi kiritadigan xorijiy investitsiyaga to‘g‘ri keladi.
2021-yil dekabr oyida ishga tushirilishi rejalashtirilgan zavod Manas Avto Sanoat qo‘shma korxonasi tomonidan “Namangan” EIZ hududida, 7 gektar maydonda barpo etiladi. Buning natijasida 220 ta yangi ish o‘rni yaratiladi.
Rejaga muvofiq, zavodda yiliga 3000 dona kichik yuk avtomobili ishlab chiqariladi. Ular ichki bozor bilan birga MDH davlatlari hamda Afg‘onistonga eksportga yo‘naltiriladi.
2021-yil manzilli dasturiga Chust tumanida Namangan Changan Motors avtozavodi qurilishi ham kiritilgan bo‘lib, yillik ishlab chiqarish quvvati 1,8 ming dona avtomobil bo‘lgan loyihaga BAA kompaniyasi bilan hamkorlikda 5,8 million dollar investitsiya yo‘naltiriladi. Loyiha 2021-yil iyun oyida ishga tushirilishi va 140 ta ish o‘rni yaratilishi ko‘zda tutilgan.
Mavzuga doir:
Izoh (0)