Ayni damda AQShning sobiq prezidenti Donald Trampning boshidan qiyin kunlar o‘tmoqda. Avvaliga uning Twitter’dagi akkaunti bloklandi, endi esa tomoshabinlar uning ishtirokidagi “Uyda yolg‘iz-2” filmidagi sahnani kesib tashlashni talab qilmoqda, deb yozadi “Harper’s Bazaar”.

Foto: “Kinopoisk”

Sobiq prezident va tadbirkor filmning juda qisqa sahnasida ko‘rinish bergan. Unga ko‘ra, Tramp film qahramoni − Kevinga Nyu-Yorkdagi Plaza mehmonxonasining qabulxonasiga boradigan yo‘lni aytib bergan. O‘sha vaqtda Tramp mehmonxonaning egasi bo‘lgan. Filmda aks etgan ushbu sahna 2016-yildan beri – Tramp prezident etib saylangandan buyon ko‘pchilikni bezovta qilib kelayotgan edi. Ayniqsa, bu tanqid Jo Bayden va Oq uy bilan bog‘liq so‘nggi voqealardan keyin yanada kuchaydi.

Eslatib o‘tamiz, 2020-yilning 6-yanvar kuni Trampning tarafdorlari AQSh Kongressi saylov natijalarini tasdiqlab, Jo Baydenning g‘alabasini rasman tasdiqlashi kerak bo‘lgan Kapitoliy binosini shiddatli hujum bilan egallab olgan. Tartibsizliklar oqibatida besh kishi halok bo‘lib, o‘nlab politsiyachilar yaralangan. Sobiq prezident o‘z tarafdorlarini qo‘llab-quvvatlash uchun Twitter tarmog‘ida bir nechta postlar yozgan, bu esa ko‘plab tanqidlar va zo‘ravonlikni rag‘batlantirish ayblovlariga asos bo‘lgan. Endilikda Twitter foydalanuvchilari Yangi yil haqidagi mashhur filmdan Trampning sahnasini olib tashlashni talab qilgan minglab tvitlarni tarqatdi.

Film prodyuserlarining baxtiga Trampning filmdagi ishtiroki shunchalik qisqa bo‘lganki, uni olib tashlash sujetga ta’sir qilmaydi. Aytgancha, tomoshabinlar hozircha Tramp ishtirok etgan boshqa filmlar haqida biror narsa demagan.