O‘zbekistonda COVID-19 ning yangi shtammini aniqlash uchun qo‘shimcha tekshiruvlar o‘tkazish talab etiladi. Bu haqda O‘zbekiston Sog‘liqni saqlash vazirligi huzuridagi koronavirusga qarshi kurash bo‘yicha shtab a’zosi Sevara Ubaydullayeva “Daryo”a muxbiri Musulmonbek Ibrohimovga bergan intervyusida aytib o‘tdi.
Ayni vaqtda dunyoning bir qator mamlakatlarida koronavirusning yangi shtammlari aniqlanmoqda. Masalan, dekabr oyidan beri virusning “braziliyacha”, “afrikacha”, “britancha” shtammlari aniqlandi. Xususan, “britancha” shtamm kasallikning odatdagi ko‘rinishidan 70 foizga yuqumliroq ekani bilan ajralib turadi.
Buyuk Britaniyada koronavirusning yangi shtammi tarqala boshlagach, O‘zbekiston bu va ushbu shtamm tarqalgan boshqa bir qator mamlakatlar bilan aviaqatnovlarni vaqtincha to‘xtatdi. Ayni vaqtda O‘zbekiston chegaralarida qo‘shimcha choralar ko‘rilib, mamlakat hududiga kiruvchi shaxslar chegaraning o‘zidayoq PZR yoki ekspress-test usulida tekshirilmoqda.
Sevara Ubaydullayevaning ma’lum qilishicha, chegarada fuqarolar PZR yoki ekspress-test usulida tekshirilganda faqat organizmida koronavirus bor-yo‘qligi aniqlanadi.
“Virusning aynan qanday shtammi ekanligini bilish uchun qo‘shimcha tekshiruv kerak. Davlatimizga kirib kelayotgan shaxslar asosan ekspress-test usulida tekshirilmoqda. Ushbu test yuqori sezuvchanlikka ega va u koronavirusning tashqi qobig‘idagi S-oqsilini aniqlash imkonini beradi. Testlar oqsilni aniqlashga 97 foizgacha sezuvchan”, — dedi shtab a’zosi.
Uning ta’kidlashicha, ekspress-testning afzalligi — 30 daqiqada javobi chiqadi va organizmga infeksiya tushganidan tashqari, fuqaro taxminan qachondan beri kasallik tarqatuvchisi ekanini ham aniqlash imkonini beradi. “Aynan virus shtammi — serotip yoki marker deyiladi. Uni aniqroq bilish uchun surtmadagi virusni chuqurroq o‘rganish talab etiladi”, — deya qo‘shimcha qildi Ubaydullayeva xonim.
Avvalroq sog‘liqni saqlash vaziri Abduhakim Hojiboyev O‘zbekistonda hali koronavirusning yangi shtammi aniqlanmagani, “bizda ushbu shtammni yuqtirgan bemor yo‘q”ligini ma’lum qilgan edi. Qayd etish joiz, “britancha” shtamm borgan-sari O‘zbekistonga yaqinlashmoqda -- kuni kecha Rossiyada koronavirusning yangi turini yuqtirib olish bilan bog‘liq ilk holat qayd etilgani ma’lum qilindi.
Izoh (0)