Namangandagi gaz to‘ldirish shoxobchasida navbatda turgan Damas avtomobilida yuzaga kelgan yong‘in shoxobcha xodimi tomonidan o‘t o‘chirish vositasi yordamida tezkorlik bilan bartaraf etilgan. Bu haqda “Daryo”ga viloyat Favqulodda vaziyatlar boshqarmasi matbuot xizmati ma’lum qildi.

Oldinroq viloyatning To‘raqo‘rg‘on tumani, “Kumidon” mahallasi hududida joylashgan “Afsona-4” avtomobillarga gaz quyish shoxobchasida gazga navbatda turgan Damas yonib ketgani ma’lum qilingandi.

Yong‘in oqibatida avtomobilning o‘rindiq va elektr jihozlari zarar ko‘rgan. Hodisa payti shoxobchada bo‘lgan fuqarolar va avtomashinalarga zarar yetmagan.

Mutaxassislar yong‘in avtomobil elektr simlarining qisqa tutashuvi tufayli kelib chiqqanini bildirmoqda.

Voqea joyiga viloyat va tuman hokimliklari, favqulodda vaziyatlar, Milliy gvardiya vakillari yetib kelgan.

Mazkur Damas haydovchisi, 1999-yilda tug‘ilgan B.A.ning aytishicha, mashina bobosiga tegishli bo‘lib, ishonchnoma orqali boshqargan va oilaviy xizmatlar uchun foydalanib turgan.

— Tungi soat 02:00 atrofida zapravkaga kelib, soat 06:00 gacha navbatda turdim. Yong‘in nimadan kelib chiqqanini, to‘g‘risi, o‘zim ham bilmayman. O‘zimga ham, boshqalarga ham ziyon-zahmat yetmaganiga, omon qolganimga shukr qilaman, — deydi u.

Namangan viloyat Favqulodda vaziyatlar boshqarmasi matbuot xizmatiga ko‘ra, sodir bo‘lgan yong‘in yuzasidan tergovga qadar surishtiruv ishlari olib borilmoqda.

Kuni kecha Namangandagi gaz-zapravkalarning birida navbatda turgan haydovchilardan biri vafot etgani haqida xabar berilgan edi. Undan avvalroq esa namanganlik haydovchilar gaz-zapravkada navbat talashib, mushtlashib ketgani ma’lum bo‘lgan edi.

Ma‘lumot uchun, O‘zbekistonda 4-yanvardan beri “magistral gaz quvurlaridagi gaz bosimini qayta tiklash maqsadida” gaz-zapravkalar tong soat 05:00 dan 15:00 gacha, cheklangan tartibda ishlamoqda, buning natijasida gaz quyish shoxobchalarida “4—6 soatlik navbatlar” yuzaga kelmoqda. Ushbu tartib qachongacha davom etishi noma’lum.