Sankt-Peterburg shahrining Nevskiy tumanida bo‘lib o‘tgan katta mushtlashuvning sakkiz ishtirokchisi hibsga olingan, ulardan uch nafari O‘zbekistondan kelgan. Bir kishi pichoqdan olgan jarohatlari bilan kasalxonaga joylashtirilgan. Bu haqda “Interfaks” xabar qilmoqda.
Xabar berishicha, hodisa 5-yanvar kuni, taxminan, tungi soat 01:00 da Karavayevskaya ko‘chasida sodir bo‘lgan. Voqea joyiga tezda yetib kelgan patrul politsiyasi janjalning sakkiz ishtirokchisini, jumladan, 33 yoshli ayolni hibsga olgan.
Hibsga olinganlarning uch nafari Rossiyada vaqtinchalik ro‘yxatdan o‘tish muddati tugagan O‘zbekiston fuqarolari, qolganlari Leningrad, Penza, Voronej va Velikiy Novgorodda yashovchi shaxslar bo‘lgan. Janjalning to‘qqizinchi ishtirokchisi – O‘zbekiston fuqarosi pichoqdan olgan jarohati bilan kasalxonaga yotqizilgan.
Politsiya ma’lumotlariga ko‘ra, mojaro yo‘l-transport hodisasi tufayli yuz bergan.
Barcha hibsga olinganlarga nisbatan mayda bezorilik bo‘yicha bayonnomalar tuzilgan. Uch kishi Rossiyada bo‘lish rejimini buzganlik uchun javobgarlikka tortilishi ma’lum qilingan.
Hozirda holat bo‘yicha jinoyat ishi qo‘zg‘atish masalasi hal qilinmoqda.
Avvalroq Turkiyada o‘zbekistonlik ayol o‘zini 10-qavatdan tashlab vafot etgani, xalqaro qidiruvda bo‘lgan o‘zbekistonlik erkak Rossiyada qo‘lga olingani hamda Turkiyada 31 yoshli o‘zbekistonlik tilanchi tomonidan pichoqlab o‘ldirilgani haqida xabar berilgandi.
Izoh (0)