O‘zbekistonda 2021-yilda 30 ta yangi maktab quriladi, bolaga ortiqcha yuklama bermaydigan “Milliy o‘quv dasturi” joriy etiladi

O‘zbekistonda maktab ta’limini tubdan yaxshilash va uning sifatini oshirish, muallimlarga munosib sharoit yaratish borasidagi islohotlar jadal davom ettiriladi, deya ma’lum qildi Prezident Shavkat Mirziyoyev 29-dekabr kuni Oliy Majlisga yo‘llagan Murojaatnomasida.

“Kelgusi yili 30 ta yangi maktab qurish, 320 ta maktabni ta’mirlash va moddiy-texnik bazasini yaxshilash maqsadida byudjetdan 2 trillion so‘m ajratiladi. Sohada yagona ‘elektron ta’lim’ tizimini joriy etishga kelgusi 2 yilda 250 milliard so‘m yo‘naltiriladi”, — dedi Prezident.

Prezident ta’lim sifatini tubdan yaxshilash maqsadida o‘quv dasturlari, o‘qituvchi va domlalar uchun metodik qo‘llanmalarni ilg‘or xalqaro dasturlarga moslashtirish lozimligini aytdi. Bundan tashqari, u bolalarning tahliliy va kreativ fikrlash qobiliyatini rivojlantirish uchun ularga sermazmun va tushunarli darsliklar ishlab chiqish kerakligini ta’kidladi.

“Bu borada kelgusi o‘quv yilida boshlang‘ich sinflarda davlat ta’lim standarti o‘rniga, ilg‘or xorijiy tajriba asosida, bolaga ortiqcha yuklama bermaydigan ‘Milliy o‘quv dasturi’ joriy etiladi”, — deya qo‘shima qildi Prezident.