O‘zbekistonda o‘rnatilgan to‘lov terminallari soni 437 163 tani tashkil etib, o‘tgan yilning mos davriga nisbatan 62 036 taga yoki 17 foizga oshdi, deb xabar bermoqda Markaziy bank matbuot xizmati.
Respublikada o‘rnatilgan bankomat va infokiosklar soni o‘tgan yilning 1-dekabr holatiga nisbatan 2 912 taga yoki 33 foizga oshib, 11 621 taga yetgan.
Markaziy bank tomonidan taqdim etilgan, yangilangan statistik ma’lumotlarga ko‘ra, O‘zbekiston hududidagi bankomatlar va kiosklarning 30 foiz qismi – 3036 tasi “Kapitalbank”ga qarashli.
Shuningdek, muomaladagi bank kartalari soni 26 milliontadan oshib, o‘tgan yilning mos davriga nisbatan 5,9 million donaga ko‘paygan.
Spot’ning yozishicha, “yosh” “Anorbank” va TBC Bank ikkovi uchun deyarli 1000 ta karta chiqargan. Bir oy oldin, iyun oyida ish boshlagan TBC Bank 801 ta kartaga, litsenziyani avgust oyi oxirida olgan “Anorbank” 104 ta kartaga ega edi. Ushbu banklar hali birorta bankomat yoki kiosk o‘rnatishga ulgurmagan.
Avval Markaziy bankning bankomatlar izlash uchun maxsus Telegram-botni ishga tushirgani, bankomatlarning joylashuvi haqidagi ma’lumotlar doimiy yangilab borilishi haqida xabar qilingandi.
Izoh (0)